 ശാന്തപുരം യൂനിവേര്‍സിറ്റിയില്‍ പി ജി ചെയ്തു കൊണ്ടിരിക്കെയാണ്
ഞാന്‍ ആദ്യമായി ഹംസ മടിക്കൈയുടെതു പോലുള്ള തികച്ചും വേറിട്ട,
സാമ്പ്രദായികമായി നാം മനസ്സിലാക്കിയ ധാരണകളെ
ചോദ്യംചെയ്തുകൊണ്ടുള്ള ഒരു പ്രഖ്യാപനം കേട്ടത്. ഡോ. പി എ കരീം
ആണ് എന്റെ ചിന്തകളെ മാറ്റിമറിച്ച ആ അറിവ് ആദ്യം നല്‍കിയത്‌.
രോഗം നമ്മുടെ ശത്രുവല്ലെന്നും മറിച്ച് മിത്രമാണെന്നും, രോഗം
വരുമ്പോഴേക്ക് മരുന്ന് കഴിക്കുന്ന ശീലം ഗുരുതരമായ ആരോഗ്യ പ്രശ്നങ്ങള്‍ക്ക് വഴിവെക്കുമെന്നും, കാട്ടു
മനുഷ്യനും , കാട്ടു മൃഗങ്ങളും നമ്മുടേത് പോലെ മരുന്നുകളുടെ അടിമയല്ലെന്നും , അതിനാല്‍ തന്നെ
പൂര്‍ണ്ണാരോഗ്യത്തോടു കൂടി ജീവിക്കുന്നുവെന്നുമുള്ള പാരസ്ഥിതിക സത്യമായിരുന്നു ആ ക്ലാസ്സിന്റെ
അടിസ്ഥാനം.
ചക്കേം മാങ്ങേം മുമ്മാസം
താളും തകരേം മുമ്മാസം
ചേനേം ചെമ്പും മുമ്മാസം
അങ്ങിനെ ഇങ്ങിനെ മുമ്മാസം
ശരാശരി കേരളീയന്റെ പാരമ്പര്യമായ വാര്‍ഷിക ജീവിതം ഇങ്ങിനെയായിരുന്നു. അന്ന്‍ ഇത്രയധികം
ഹോസ്പിറ്റലുകള്‍ ഉണ്ടായിരുന്നില്ല, രോഗികളും. ഉത്തരാധുനിക കേരളത്തില്‍ ഭീകരമായി
ഹോസ്പിറ്റലുകള്‍ പെരുത്തു , രോഗികളും. ധാര്‍മികതയില്ലാത്തവന്റെ കയ്യില്‍ കത്തി ലഭിച്ചാലുള്ള
വിപത്ത്‌ ഓരോ ഓപ്പറേഷന്‍ തിയേറ്ററില്‍ നിന്നും നാം കേള്‍ക്കുന്നു. വലിയ ഡിഗ്രിയുള്ള ഡോക്ടര്‍മാര്‍
അങ്ങിനെയാണ് കിഡ്നി കള്ളന്മാരായി അധപതിക്കുന്നത്‌ .
നിന്റെ ഔഷധം നിന്റെ ഭക്ഷണമാണ്
നിന്റെ ഭക്ഷണം ഔഷധമായിരിക്കട്ടെ എന്ന മഹാത്മജിയുടെ പ്രഖ്യാപനത്തെ അന്വര്‍ഥമാക്കുന്ന
ക്ലാസ്സായിരുന്നു. അല്ല തികച്ചും നല്ലൊരു അനുഭവമായിരുന്നു ഹംസ മടിക്കൈയുടെ വിവരണം .
40 ഇനം ചീരകള്‍ കേരളത്തിലുണ്ടായിരിക്കെയാണ് നാം എന്റൊസല്‍ഫാന്‍ അടിച്ച വിഷം കടയില്‍ നിന്ന്‍
കഴിക്കുന്നത്.
നമ്മുടെ വീടിനു ചുറ്റും ഔഷധത്തോട്ടം എന്ന മഹത്തായ സന്ദേശം ഓര്‍കിഡും ഹൈഡ്രാഞ്ചിയയും
യൂഫോര്‍ബിയയുമൊക്കെ ഒരു ഭ്രാന്തായി മാറിയ പുതിയ കേരളത്തില്‍ എങ്ങിനെ സ്വീകാര്യമാകും
എന്നത് ഒരു പ്രസക്ത ചോദ്യമാണ്.
ഈ ഒരു ധാര്‍മ്മിക പ്രതിസന്ധി നിലനില്‍ക്കുന്ന സാഹചര്യത്തിലാണ് ചാവക്കാട് ഓണ്‍ലൈന്‍
ഇത്തരമൊരു മഹത്തായ സന്ദേശം പ്രചരിപ്പിക്കല്‍ അവരുടെ വാര്‍ഷികത്തിന് തിരഞ്ഞെടുത്തത്‌.
വേറിട്ട ഈ പാത തിരഞ്ഞെടുത്തതില്‍ അവരെ മുക്തകണ്ഠം പ്രശംസിക്കുന്നു. മഹാന്മാര്‍
മഹാന്മാരായത്‌ നമ്മള്‍ ചെയ്യാത്ത കാര്യങ്ങള്‍ ചെയ്തതു കൊണ്ടല്ല, മറിച്ച് ചെയ്യുന്ന കാര്യങ്ങള്‍
വേറിട്ടു ചെയ്തതാണ് അവരുടെ മഹത്വം എന്ന് ബര്‍ണാഡ്‌ഷാ പറയുന്നു.
മാതാപിതാക്കളോടുള്ള അനുസരണ, അക്രമം ചെയ്യാത്ത മനസ്സ്‌ , ദൈവത്തോടുള്ള ഉള്ളുണര്‍ന്ന
പ്രാര്‍ത്ഥന ഇവയൊന്നുമില്ലെങ്കില്‍ ഒരു മരുന്നും ഫലം ചെയ്യില്ല . നമുക്ക് വിദ്യാഭ്യാസമല്ല
സ്നേഹാഭ്യാസമാണ് വേണ്ടത് , തുടങ്ങിയ ഹംസ മടിക്കൈയ്യുടെ ചിന്തകളെല്ലാം ഏറെ
പ്രസക്തമാണ് .
HEALTHY BODY IN A HEALTHY MIND
വലിയൊരീ ലോകം നന്നാവാന്‍ ചെറിയൊരു കാര്യം കാതിലോതാം ഞാന്‍ സ്വയം നന്നാവുക
[കുഞ്ഞുണ്ണി മാഷ്‌ ].
സര്‍വ്വ ഭാവുകങ്ങള്‍ .
സുലൈമാന്‍ അസ്ഹരി
ഖത്തീബ്, മുതുവട്ടൂര്‍ ജുമാമസ്ജിദ്‌.
| 
