ഗാന്ധി ഗ്രാമം പദ്ധതി – രമേശ് ചെന്നിത്തല അകലാട് നായാടി ഉന്നതിയിൽ

ചാവക്കാട്: പതിനാറാമത് ഗാന്ധിഗ്രാമം പദ്ധതിയുടെ ഭാഗമായി മുൻ ആഭ്യന്തരമന്ത്രി രമേശ് ചെന്നിത്തല എം.എൽ.എ പുതുവത്സര ദിനമായ ജനുവരി ഒന്നിന് പുന്നയൂർ അകലാട് നായാടി ഉന്നതിയിൽ എത്തി. ആദിവാസി-പട്ടികജാതി മേഖലകളിൽ അധിവസിക്കുന്നവരുടെ പ്രശ്നങ്ങൾ നേരിട്ട് മനസ്സിലാക്കുന്നതിനും അവ സർക്കാരിന്റെ ശ്രദ്ധയിൽപ്പെടുത്തുന്നതിനുമായി രമേശ് ചെന്നിത്തല ആരംഭിച്ച ഗാന്ധി ഗ്രാമം പദ്ധതിയുടെ ഭാഗമായാണ് അദ്ദേഹം നിയോജകമണ്ഡലത്തിലെ പുന്നയൂർ പഞ്ചായത്തിലെ അകലാട് നായാടി ഉന്നതിയിൽ പുതുവത്സരം ആഘോഷിക്കുന്നത്.​ അകലാട് ഖാദ്രിയ പള്ളി സെന്ററിൽ നിന്ന് രമേശ് ചെന്നിത്തലയെ നായാടി ഉന്നതിയിലേക്ക് സ്വീകരിച്ചാനയിച്ചു.

തുടർന്ന് നായാടി ഉന്നതിയിലെ മുതിർന്ന അംഗം യാശോദാമ്മ ഭദ്രദീപം തെളിയിച്ചു ഉദ്ഘാടനം ചെയ്തു. സംഘാടകസമിതി കൺവീനർ കെ പി ഉമ്മർ സ്വാഗതം പറഞ്ഞു. സംഘാടകസമിതി കോഡിനേറ്റർ സി എ ഗോപപ്രതാപൻ അധ്യക്ഷത വഹിച്ചു. കെപിസിയുടെ ജനറൽ സെക്രട്ടറിമാരായ എ എച് ഷിബു, ഷാനിമോൾ ഉസ്മാൻ, ഡെപ്യൂട്ടി മേയർ എ പ്രശാന്ത്, ജോസഫ് ചാലിശ്ശേരി, ഷാജി കൊടുങ്ങല്ലത്ത്, എം വി ഹൈദരാലി, മുസ്ലിം ലീഗ് ജില്ലാ സെക്രട്ടറി ഹംസ കുട്ടി, ദളിത് കോൺഗ്രസ് സംസ്ഥാന പ്രസിഡന്റ് പി കെ ശശി, വാർഡ് മെമ്പർ ഷഹന, ജില്ലാ പഞ്ചായത്ത് മെമ്പർ ഓ അബ്ദുറഹ്മാൻ കുട്ടി തുടങ്ങിയ ആളുകൾ സംസാരിച്ചു. വിശിഷ്ടാതിഥികളുടെ ആശംസകൾക്ക് ശേഷം പ്രഭാതഭക്ഷണം വിതരണം ചെയ്തു.

കോളനി നിവാസികളുടെ പ്രശ്നങ്ങൾ കേൾക്കുക, പരിഹാരമാർഗ്ഗങ്ങൾ കണ്ടെത്തുക, തൊഴിലാളികൾക്കും കർഷകർക്കും അർഹമായ ആനുകൂല്യങ്ങൾ ലഭ്യമാക്കാൻ നടപടി സ്വീകരിക്കുക എന്നിവയാണ് പദ്ധതിയുടെ പ്രധാന ലക്ഷ്യങ്ങൾ.​ഉച്ചഭക്ഷണത്തിന് ശേഷം കോളനി വികസന രൂപരേഖ സംബന്ധിച്ച ചർച്ചയും സമഗ്ര മാസ്റ്റർ പ്ലാൻ അവതരണവും നടക്കും. തുടർന്ന് സ്കൂൾ-കോളേജ് വിദ്യാർത്ഥികളുമായുള്ള അഭിമുഖം, ആദരിക്കൽ ചടങ്ങ്, വിദ്യാർത്ഥികളുടെയും ഫോക്കൽ അക്കാദമിയുടെയും കലാപരിപാടികൾ എന്നിവയും അരങ്ങേറും.