സ്ഥാനാർത്ഥി പട്ടികയിൽ മാറ്റമില്ല – സിപിഐ സ്ഥാനാർത്ഥികളെ പിൻവലിച്ചു

ചാവക്കാട് : ചാവക്കാട് നഗരസഭയിൽ സിപിഐ സ്ഥാനാർത്ഥികളെ പിൻവലിച്ചു. എൽഡിഎഫ് പ്രഖ്യാപിച്ച ഔദ്യോഗിക സ്ഥാനാർത്ഥികളിൽ മാറ്റമില്ല. സിപിഎമ്മിന് എതിരെ നിർത്തിയ സ്ഥാനാർത്ഥികളാണ് പത്രിക പിൻവലിച്ചത്. 2030 -ൽ കൂടുതൽ സീറ്റ് നൽകും എന്ന ധാരണയുടെ അടിസ്ഥാനത്തിലാണ് സ്ഥാനാർത്ഥികളെ പിൻവലിച്ചതെന്ന് സി പി എം നേതൃത്വം. അഞ്ചു വാർഡുകളിലായിരുന്നു  എൽ ഡി എഫ് ഔദ്യോഗിക സ്ഥാനാർഥികൾക്ക് പുറകെ സി പി ഐ സ്ഥാനാർഥികൾ നാമനിർദേശ  പത്രിക നൽകിയിരുന്നത്. സീറ്റ് തർക്കത്തിന്ന് പരിഹാരമാവാതിരുന്നതിനാലാണ് സി പി ഐ പരസ്യമായി സി പി എം നെതിരെ രംഗത്ത് വന്നത്.

കഴിഞ്ഞ തവണ സി പി ഐ സ്ഥാനാർത്ഥി മത്സരിച്ച് തോറ്റ വാർഡാണ് ചാവക്കാട് നഗരസഭയിലെ വാർഡ്‌ 8.  പുതിയ വാർഡ്‌ വിഭജനത്തെ തുടർന്ന് വാർഡ്‌ 8 ൽ എൽ ഡി എഫി ന് വിജയ സാധ്യത കണക്കാക്കിയിരുന്നു. എന്നാൽ സി പി ഐ യുമായി ചർച്ചചെയ്യാതെ വാർഡ്‌ 8 ൽ സി പി എം സ്ഥാനാർത്ഥിയായി കെ സി സുനിൽ   തിരഞ്ഞെടുപ്പ് പ്രവർത്തനങ്ങൾ ആരംഭിച്ചതാണ്  സി പി ഐ യെ പ്രകോപിപ്പിച്ചത്. പ്രശ്ന പരിഹാരം എന്ന നിലയിൽ വാർഡ്‌ 8 ന് പകരം ചാവക്കാട് ഈസ്റ്റിൽ മറ്റൊരു സീറ്റ് ആവശ്യപ്പെട്ടിരുന്നെങ്കിലും ലഭിച്ചില്ല. സി പി ഐ യുടെ സ്ഥിരം സീറ്റായ വാർഡ്‌ 9 വെച്ച് മാറാനും സി പി ഐ ആവശ്യപ്പെട്ടിരുന്നു. എന്നാൽ ഒന്നും നടന്നില്ല. തുടർന്നാണ് നാമനിർദേശ പത്രിക സമർപ്പിക്കാനുള്ള അവസാന നിമിഷത്തിൽ സി പി ഐ സ്ഥാനാർഥികൾ രംഗത്ത് വന്നത്. 8, 9, 15, 17, 18 വാർഡുകളിലായിരുന്നു എൽ ഡി എഫ് ഔദ്യോഗിക സ്ഥാനാർഥികൾക്ക് പുറമെ സി പി ഐ സ്ഥാനാർഥികൾ നാമനിർദേശ പത്രിക നൽകിയത്.