ചാവക്കാട് മേഖലയിലെ തദ്ദേശ സ്വയംഭരണ സ്ഥാപനങ്ങളിലെ സ്റ്റാൻഡിങ് കമ്മിറ്റി തിരഞ്ഞെടുപ്പ് നാളെ

ഗുരുവായൂർ: നഗരസഭയിലെ അഞ്ച് സ്റ്റാൻഡിങ് കമ്മിറ്റി അധ്യക്ഷന്മാരെ തെരഞ്ഞെടുക്കുന്നതിനുള്ള വോട്ടെടുപ്പ് നാളെ നടക്കും. ഭരണകക്ഷിയായ എൽ.ഡി.എഫ് തങ്ങളുടെ അധ്യക്ഷ സ്ഥാനാർഥികളെ പ്രഖ്യാപിച്ചു. ജനുവരി ആറ് ചൊവ്വാഴ്ച രാവിലെ 10.30-ന് വരണാധികാരി എൻ. വിജയകുമാറിന്റെ നേതൃത്വത്തിലാണ് തെരഞ്ഞെടുപ്പ് നടപടികൾ നടക്കുക.

​ഷാനി റെജി – സി.പി.ഐ (വികസനം), വി. അനൂപ് – സി.പി.എം (ക്ഷേമം), എ.ടി. ഹംസ – സി.പി.എം (പൊതുമരാമത്ത്), ബിന്ദു അജിത്കുമാർ (ആരോഗ്യം), രതി ജനാർദ്ദനൻ (വിദ്യാഭ്യാസം) എന്നിവരെയാണ് അധ്യക്ഷ സ്ഥാനങ്ങളിലേക്ക് എൽ.ഡി.എഫ് നിശ്ചയിച്ചിട്ടുള്ളത്.

​നഗരസഭയിലെ ആകെ ആറ് സ്റ്റാൻഡിങ് കമ്മിറ്റികളിൽ ധനകാര്യ സ്റ്റാൻഡിങ് കമ്മിറ്റിയുടെ അധ്യക്ഷസ്ഥാനം നിയമപ്രകാരം വൈസ് ചെയർമാനാണ് വഹിക്കുന്നത്. ബാക്കിയുള്ള അഞ്ച് കമ്മിറ്റികളിലേക്കാണ് നാളെ തെരഞ്ഞെടുപ്പ് നടക്കുന്നത്. നഗരസഭയിലെ എല്ലാ കൗൺസിലർമാരും വിവിധ സ്റ്റാൻഡിങ് കമ്മിറ്റികളിൽ അംഗങ്ങളാകും. തെരഞ്ഞെടുപ്പ് പൂർത്തിയാകുന്നതോടെ നഗരസഭയുടെ വികസന-ക്ഷേമ പ്രവർത്തനങ്ങൾ കൂടുതൽ സജീവമാകും.