ബെൽജിയത്തെ തകർത്ത് സ്പെയിൻ സെമിയിൽവീണ്ടും രക്ഷകനായി മിക്കൽ മെറീനോസെമിയിൽ ഫ്രാൻസുമായി ഏറ്റുമുട്ടും

ആവേശപ്പോരാട്ടത്തിനൊടുവിൽ ബെൽജിയത്തെ ഒന്നിനെതിരെ രണ്ട് ഗോളുകൾക്ക് വീഴ്ത്തി മുൻ ലോകചാമ്പ്യന്മാരായ സ്പെയിൻ ലോകകപ്പിന്റെ സെമിഫൈനലിൽ പ്രവേശിച്ചു. മത്സരത്തിന്റെ അവസാന നിമിഷങ്ങളിൽ സൂപ്പർ സബ്ബായി കളത്തിലിറങ്ങി സ്പെയിനിന്റെ രക്ഷകനായ മിക്കൽ മെറീനോയാണ് 88-ാം മിനിറ്റിൽ ടീമിന്റെ വിജയഗോൾ കുറിച്ചത്. തുടർച്ചയായ രണ്ടാം മത്സരത്തിലാണ് മെറീനോ പകരക്കാരന്റെ റോളിലെത്തി ടീമിനായി വലകുലുക്കുന്നത്. 2010-ൽ കിരീടം ചൂടിയതിന് ശേഷം ഇതാദ്യമായാണ് സ്പാനിഷ് പട ലോകകപ്പിന്റെ അവസാന നാലിൽ ഇടംപിടിക്കുന്നത്. സെമിയിൽ കരുത്തരായ ഫ്രാൻസാണ് സ്പെയിനിന്റെ എതിരാളികൾ.

​മത്സരത്തിന്റെ തുടക്കം മുതൽ പന്തടക്കത്തിൽ ആധിപത്യം പുലർത്തിയ സ്പെയിനാണ് ആദ്യം ലീഡെടുത്തത്. 30-ാം മിനിറ്റിൽ ലമീൻ യമാൽ വലതുവിങ്ങിലൂടെ നടത്തിയ മുന്നേറ്റത്തിനൊടുവിൽ പന്ത് പെദ്രോ പോറോയ്ക്ക് കൈമാറി. പോറോ നൽകിയ ക്രോസിൽ നിന്ന് ഡാനി ഒൽമോ തൊടുത്ത ഷോട്ട് ബെൽജിയം കീപ്പർ തിബോ കോർട്ടോ തട്ടിയകറ്റിയെങ്കിലും, റീബൗണ്ടായി വന്ന പന്ത് ഫാബിയൻ റൂയിസ് തകർപ്പൻ ഷോട്ടിലൂടെ വലയിലെത്തിക്കുകയായിരുന്നു. എന്നാൽ 41-ാം മിനിറ്റിൽ ഹെഡറിലൂടെ ഗോൾ നേടി ചാൾസ് ഡി കെറ്റലാരെ ബെൽജിയത്തെ മത്സരത്തിലേക്ക് തിരികെ കൊണ്ടുവന്നു. തിമോത്തി കസ്റ്റാന്യ നൽകിയ ക്രോസിൽ സ്പാനിഷ് പ്രതിരോധ താരം പൗ കുബാർസിയെ മറികടന്നാണ് കെറ്റലാരെ ലക്ഷ്യം കണ്ടത്. നടപ്പു ലോകകപ്പിൽ 650 മിനിറ്റുകൾക്ക് ശേഷം സ്പാനിഷ് ഗോളി ഉനായ് സിമോൻ വഴങ്ങുന്ന ആദ്യ ഗോൾ കൂടിയായിരുന്നു ഇത്. ആദ്യ പകുതി പിരിയുമ്പോൾ ഇരുടീമുകളും 1-1 എന്ന സമനിലയിലായിരുന്നു.

​രണ്ടാം പകുതിയിൽ സ്പെയിൻ ആക്രമണം ശക്തമാക്കിയതോടെ ബെൽജിയം പ്രതിരോധത്തിലേക്ക് വലിഞ്ഞു. ഇതിനിടെ ബെൽജിയത്തിന് തിരിച്ചടിയായി ഒന്നാം നമ്പർ ഗോളി തിബോ കോർട്ടോ പരിക്കേറ്റ് പുറത്തുപോവുകയും സെന്നെ ലമെൻസ് പകരക്കാരനായി ഗോൾവലയ്ക്ക് മുന്നിലെത്തുകയും ചെയ്തു. മത്സരത്തിന്റെ 88-ാം മിനിറ്റിൽ ഈ ഗോൾകീപ്പർ വരുത്തിയ പിഴവാണ് സ്പെയിനിന് വിജയമൊരുക്കിയത്. പൗ കുബാർസി ബോക്സിന് പുറത്തുനിന്ന് തൊടുത്ത നെടുനീളൻ ഷോട്ട് കൃത്യമായി കയ്യിലൊതുക്കാൻ ലമെൻസിന് സാധിച്ചില്ല. കീപ്പറുടെ കൈകളിൽ നിന്ന് തെറിച്ചുവീണ പന്ത് ബോക്സിലുണ്ടായിരുന്ന മിക്കൽ മെറീനോ അനായാസം വലയിലേക്ക് വഴിതിരിച്ചുവിട്ടതോടെ സ്പെയിൻ സെമി ബെർത്തും വിജയവും ഉറപ്പിച്ചു.