ചാവക്കാട് ഉപജില്ലാ കായികമേള: ഫുട്ബോളിൽ ഇരട്ടക്കിരീടവുമായി ജി.വി.എച്ച്.എസ്.എസ് കടപ്പുറം ചരിത്രനേട്ടത്തിൽ

ചാവക്കാട്: ഉപജില്ലാ സ്കൂൾ കായികമേളയിൽ സമാനതകളില്ലാത്ത ചരിത്ര വിജയവുമായി ജി.വി.എച്ച്.എസ്.എസ് കടപ്പുറം. സീനിയർ, ജൂനിയർ ആൺകുട്ടികളുടെ ഫുട്ബോൾ മത്സരങ്ങളിൽ ഒരേസമയം ചാമ്പ്യന്മാരായാണ് സ്കൂൾ ഇരട്ടക്കിരീടം സ്വന്തമാക്കിയത്. ചാവക്കാട് ഗവൺമെന്റ് ഹയർ സെക്കൻഡറി സ്കൂൾ മൈതാനത്ത് നടന്ന ആവേശകരമായ ഫൈനൽ പോരാട്ടങ്ങളിൽ ആതിഥേയരായ ചാവക്കാട് സ്കൂളിനെ പരാജയപ്പെടുത്തിയാണ് കടപ്പുറം സ്കൂൾ ജേതാക്കളായത്. ഇതോടെ ഒരേ വർഷം രണ്ട് കാറ്റഗറിയിലും ഒന്നാം സ്ഥാനം സ്വന്തമാക്കുന്ന വിദ്യാലയം എന്ന അപൂർവ്വ നേട്ടം ജി.വി.എച്ച്.എസ്.എസ് കടപ്പുറത്തിന് സ്വന്തമായി.​സ്കൂളിൽ കായിക അധ്യാപകന്റെ (പി.ഇ.ടി) സ്ഥിരം തസ്തികയോ നിയമനമോ ഇല്ലാതിരുന്നിട്ടും അസാധാരണ ഇച്ഛാശക്തിയോടെയാണ് ടീം ഈ നേട്ടം കൈവരിച്ചത്. മറ്റ് വിഷയങ്ങളിലെ അധ്യാപകരും പൂർവവിദ്യാർത്ഥികളും കൈകോർത്ത് നൽകിയ ചിട്ടയായ പരിശീലനമാണ് വിദ്യാർത്ഥികളെ വിജയത്തിലേക്ക് നയിച്ചത്.​ടൂർണമെന്റിലെ മികച്ച പ്രകടനത്തിന്റെ അടിസ്ഥാനത്തിൽ രണ്ട് വിഭാഗങ്ങളിൽ നിന്നുമായി പതിനഞ്ചോളം താരങ്ങൾ ഉപജില്ലാ ഫുട്ബോൾ ടീമിലേക്ക് തിരഞ്ഞെടുക്കപ്പെട്ടു. പ്രതികൂല സാഹചര്യങ്ങളെ മറികടന്ന് ഉജ്ജ്വല വിജയം നേടിയ വിദ്യാർത്ഥികളെയും അവർക്ക് പിന്തുണ നൽകിയ അധ്യാപകരെയും പൂർവവിദ്യാർത്ഥികളെയും സ്കൂൾ അധികൃതരും നാട്ടുകാരും അഭിനന്ദിച്ചു.