ഗുരുവായൂരിൽ ആനയെ പ്രതീകാത്മകമായി നടയിരുത്തി

ഗുരുവായൂർ: ഗുരുവായൂർ ക്ഷേത്രത്തിൽ പ്രതീകാത്മകമായി ആനയെ നടയിരുത്തൽ ചടങ്ങ് നടന്നു. ഇന്ന് രാവിലെ ശീവേലിക്കു ശേഷമായിരുന്നു ചടങ്ങുകൾ നടന്നത്. കോഴിക്കോട് തിരുവണ്ണൂർ സ്വദേശി പി.എ. പ്രദീപും വസന്തയും കുടുംബവുമാണ് ഗുരുവായൂരപ്പന് വഴിപാടായി ആനയെ സമർപ്പിച്ചത്.​ ക്ഷേത്രം മേൽശാന്തി ബ്രഹ്മശ്രീ മൂർത്തിയേടത്ത് മന സുധാകരൻ നമ്പൂതിരി ചടങ്ങുകൾക്ക് മുഖ്യകാർമികത്വം വഹിച്ചു. വഴിപാടിന്റെ ഭാഗമായി പത്തുലക്ഷം രൂപ ഇവർ ദേവസ്വത്തിൽ അടച്ചു. ദേവസ്വം കൊമ്പൻ ബൽറാമിനെയാണ് പ്രതീകാത്മകമായി നടയിരുത്തിയത്.​

ചടങ്ങിൽ ക്ഷേത്രം ഊരാളനും ദേവസ്വം ഭരണസമിതി അംഗവുമായ ബ്രഹ്മശ്രീ മല്ലിശ്ശേരി പരമേശ്വരൻ നമ്പൂതിരിപ്പാട്, ദേവസ്വം അഡ്മിനിസ്ട്രേറ്റർ കെ.പി. വിനയൻ, ക്ഷേത്രം ഡെപ്യൂട്ടി അഡ്മിനിസ്ട്രേറ്റർ പ്രമോദ് കളരിക്കൽ, ജീവധനം ഡെപ്യൂട്ടി അഡ്മിനിസ്ട്രേറ്റർ എം. രാധ എന്നിവർ പങ്കെടുത്തു.​കൂടാതെ അസിസ്റ്റന്റ് മാനേജർമാരായ രാമകൃഷ്ണൻ (ക്ഷേത്രം), സുന്ദരരാജൻ (ജീവധനം), വിവിധ പാരമ്പര്യ അവകാശികൾ, വഴിപാടു നേർന്ന കുടുംബാംഗങ്ങൾ, ഭക്തജനങ്ങൾ എന്നിവരും ചടങ്ങിന് സാക്ഷ്യം വഹിച്ചു