പുന്നയൂർ പഞ്ചായത്തിൽ ഹരിതകർമസേന അംഗങ്ങളെയും തൊഴിലുറപ്പ് തൊഴിലാളികളെയും ആദരിച്ചു

പുന്നയൂർ : ​സ്വച്ഛതാ ഹി സേവാ ക്യാമ്പയിന്റെ ഭാഗമായി വാർഡ് 15-ൽ വാർഡ് മെമ്പറുടെ നേതൃത്വത്തിൽ വിപുലമായ ശുചീകരണ യജ്ഞം സംഘടിപ്പിച്ചു. പരിപാടിയുടെ ഭാഗമായി വാർഡിലെ ഹരിതകർമസേന അംഗങ്ങളെയും തൊഴിലുറപ്പ് തൊഴിലാളികളെയും ആദരിച്ചു.​വാർഡ് മെമ്പർ ഷാനിഫ് കിഴക്കത്തറ അധ്യക്ഷത വഹിച്ച ചടങ്ങ് ബ്ലോക്ക് പഞ്ചായത്ത് പ്രസിഡൻ്റ് അഡ്വ. കെ.കെ. ഷിബു ഉദ്ഘാടനം ചെയ്തു. ശുചീകരണ യജ്ഞത്തിൽ പെരുമ്പിലാവ് അൻസാർ വിമൻസ് കോളേജ്, തൊഴിയൂർ ഐ.സി.എ കോളേജ് എന്നിവിടങ്ങളിലെ എൻ.എസ്.എസ് വോളണ്ടിയർമാർ മുഖ്യപങ്ക് വഹിച്ചു.​ബ്ലോക്ക് വൈസ് പ്രസിഡൻ്റ് ഷഹർബാൻ, ഐ.ആർ.ടി.സി കോർഡിനേറ്റർ ആരിഫ ബി.എസ്, അൻസാർ കോളേജ് അധ്യാപിക ബഷീറ, ഐ.സി.എ കോളേജ് അധ്യാപിക മീനു എന്നിവർ ആശംസകൾ അർപ്പിച്ചു സംസാരിച്ചു.​140-ഓളം പേർ പങ്കെടുത്ത യജ്ഞത്തിൽ വാർഡിന്റെ വിവിധ ഭാഗങ്ങളിൽ നിന്നായി ഏകദേശം 260 കിലോഗ്രാം മാലിന്യം ശേഖരിച്ചു. ഹരിതകർമസേന അംഗങ്ങൾ, തൊഴിലുറപ്പ് തൊഴിലാളികൾ, കുടുംബശ്രീ പ്രവർത്തകർ, നാട്ടുകാർ എന്നിവർ ശുചീകരണത്തിൽ സജീവമായി പങ്കെടുത്തു. ആശ കോർഡിനേറ്റർ ചടങ്ങിന് നന്ദി രേഖപ്പെടുത്തി.