പാവറട്ടിയിൽ കുറുനരി ഭീതി: എട്ടോളം പേർക്ക് കടിയേറ്റു; പശുവിനെയും വളർത്തുനായയെയും ആക്രമിച്ചു

പാവറട്ടി: പാവറട്ടി പഞ്ചായത്തിലെ മരുതയൂർ, കാളാനി മേഖലകളിൽ കുറുനരിയുടെ ആക്രമണം. എട്ടോളം പേർക്ക് കടിയേറ്റു. പ്രദേശത്തെ വളർത്തുമൃഗങ്ങളെയും കുറുനരി  ആക്രമിച്ചിട്ടുണ്ട്.

​ഇന്ന് രാവിലെ 11.30 ഓടെയാണ് മരുതയൂർ ഭാഗത്ത് ആദ്യം ആക്രമണമുണ്ടായത്. വഴിനടന്നു പോയവർക്കും വീട്ടുപറമ്പിൽ നിന്നവർക്കുമെല്ലാം നേരെ കുറുനരി പാഞ്ഞടുക്കുകയായിരുന്നു. മരുതയൂർ അമ്പാടി വീട്ടിൽ അനിൽ ഉൾപ്പെടെ നാലുപേർക്ക് ഈ പ്രദേശത്ത് വെച്ച് കടിയേറ്റു. ഇവർ ചാവക്കാട് താലൂക്ക് ആശുപത്രിയിൽ ചികിത്സ തേടി. ഒരു അതിഥി തൊഴിലാളിക്കും രണ്ട് സ്ത്രീകൾക്കുമാണ് ഇവിടെ വെച്ച് പരിക്കേറ്റത്. പ്രദേശത്തെ ഒരു വളർത്തുനായയെയും കുറുനരി കടിച്ചുപരിക്കേൽപ്പിച്ചിട്ടുണ്ട്.

​തുടർന്ന് കാളാനി ഭാഗത്തേക്ക് നീങ്ങിയ കുറുനരി അവിടെയും നാലുപേരെ ആക്രമിച്ചു. പ്രദേശത്തെ ഒരു പശുവിന്റെ അകിട് കുറുനരി കടിച്ചുപൊളിച്ചു. പരിക്കേറ്റ പശുവിന് മൃഗസംരക്ഷണ വകുപ്പ് ഉദ്യോഗസ്ഥർ എത്തി അടിയന്തര ചികിത്സ നൽകിയിട്ടുണ്ട്.

​പകൽസമയത്ത് ജനവാസ മേഖലയിലിറങ്ങി കുറുനരി തുടരെത്തുടരെ ആളുകളെ ആക്രമിച്ചതോടെ പ്രദേശവാസികൾ ഭീതിയിലാണ്.