മണത്തല ഗവൺമെൻ്റ് ഹൈസ്കൂളിന് തുടർച്ചയായി നാലാം വർഷവും എ ഗ്രേഡ് തിളക്കം

ചാവക്കാട് : സംസ്ഥാന സ്കൂൾ കലോത്സവത്തിൽ മണത്തല ഗവൺമെൻ്റ് ഹൈസ്കൂളിന് തുടർച്ചയായി നാലാം വർഷവും എ ഗ്രേഡ് തിളക്കം. തിരുവനന്തപുരത്ത് വെച്ച് നടന്ന 63 -ാമത് സംസ്ഥാന സ്കൂൾ കലോത്സവത്തിൽ മണത്തല ഗവൺമെൻ്റ് ഹൈസ്കൂളിലെ തമന്ന മുഹമ്മദ് അമീൻ അറബിക് ക്വിസ് മത്സരത്തിൽ എ ഗ്രേഡ് കരസ്ഥമാക്കി. അക്കാദമിക രംഗത്ത് ജില്ലാ സംസ്ഥാന തല മത്സരങ്ങളിൽ നിരവധിയിനങ്ങളിൽ കഴിവ് തെളിയിച്ചിട്ടുണ്ട് തമന്ന. മുഹമ്മദ് അമീൻ സാജിത ദമ്പതികളുടെ മകളായ ഈ ഒമ്പതാം ക്ലാസ് വിദ്യാർത്ഥിനി പഠനത്തിലും മികച്ച നിലവാരം പുലർത്തുന്നു. സിവിൽ സർവീസ് നേടുക എന്ന മോഹവും ഈ കൊച്ചു മിടുക്കിക്കുണ്ട്. തീരദേശത്തെ വിദ്യാർത്ഥികൾ പഠിക്കുന്ന ഒരു ഗവൺമെൻ്റ് സ്കൂളായ മണത്തല ഹൈസ്കൂൾ വിവിധ മത്സരങ്ങളിലായി നാലാം തവണയാണ് സംസ്ഥാനതലത്തിൽ എ ഗ്രേഡ് നേടുന്നത്