വിവാഹ മാമാങ്കം – നാളെ ഗുരുവായൂർ ക്ഷേത്രത്തിൽ പ്രത്യേക ക്രമീകരണങ്ങൾ
ഗുരുവായൂർ : ഗുരുവായൂര് ക്ഷേത്രത്തില് നാനൂറോളം വിവാഹങ്ങള് പ്രതീക്ഷിക്കുന്ന സെപ്റ്റംബര് 8 ഞായറാഴ്ച ദര്ശനവും വിവാഹ ചടങ്ങുകളും സുഗമമായി നടത്താന് ഗുരുവായൂര് ദേവസ്വം പ്രത്യേക ക്രമീകരണങ്ങള് ഒരുക്കിയതായി ദേവസ്വം ചെയര്മാന് ഡോ. വികെ വിജയന് അറിയിച്ചു. ഭക്തര്ക്ക് തടസ്സമില്ലാതെ ക്ഷേത്ര ദര്ശനത്തിനും വഴിയൊരുക്കും.
വിവാഹങ്ങൾ സമയബന്ധിതമായി പൂര്ത്തിയാക്കാന് പുലര്ച്ചെ നാലു മണി മുതല് കല്യാണങ്ങള് നടത്തും. താലികെട്ടിനായി ആറ് മണ്ഡപങ്ങള് സജ്ജമാക്കും. മണ്ഡപങ്ങളെല്ലാം ഒരു പോലെ അലങ്കരിക്കും. താലികെട്ട് ചടങ്ങ് നിര്വ്വഹിക്കാന് ആറ് ക്ഷേത്രം കോയ്മമാരെ മണ്ഡപത്തിലേക്ക് നിയോഗിക്കും. വിവാഹമണ്ഡപത്തിന് സമീപം 2 മംഗളവാദ്യസംഘത്തെ നിയോഗിക്കും. വരനും വധുവുമടങ്ങുന്ന വിവാഹസംഘം നേരത്തെയെത്തി ക്ഷേത്രം തെക്കേ നടയിലെ പട്ടര്കുളത്തിനോട് ചേര്ന്നുള്ള താല്ക്കാലിക പന്തലിലെ കൗണ്ടറിലെത്തി ടോക്കണ് വാങ്ങണം. ഇവര്ക്ക് ആ പന്തലില് വിശ്രമിക്കാം.
താലികെട്ട് ചടങ്ങിന്റെ ഊഴമെത്തുമ്പോള് ഇവരെ മേല്പുത്തൂര് ആഡിറ്റോറിയത്തില് പ്രവേശിപ്പിക്കും. തുടര്ന്ന് കിഴക്കേ നട മണ്ഡപത്തിലെത്തി വിവാഹ ചടങ്ങ് നടത്താം. കല്യാണം കഴിഞ്ഞാല് വിവാഹ സംഘം ക്ഷേത്രം തെക്കേ നട വഴി മടങ്ങി പോകണം. കിഴക്കേ നടവഴി മടങ്ങാന് അനുവദിക്കില്ല. വധു വരന്മാര്ക്കൊപ്പം ഫോട്ടോഗ്രാഫര്മാര് ഉള്പ്പെടെ 24പേര്ക്കേ മണ്ഡപത്തിന് സമീപം പ്രവേശനം അനുവദിക്കും. അഭൂതപൂര്വ്വമായ തിരക്ക് പ്രതീക്ഷിക്കുന്നതിനാലാണ് ഈ നിയന്ത്രണം.
Comments are closed.