പശ്ചിമേഷ്യൻ സംഘർഷം: ടാർ വില കുതിച്ചുയർന്നു; ചാവക്കാട് ഉൾപ്പെടെയുള്ള റോഡ് നിർമ്മാണങ്ങൾ സ്തംഭനാവസ്ഥയിൽ

ചാവക്കാട്: പശ്ചിമേഷ്യൻ സംഘർഷത്തെ തുടർന്ന് ക്രൂഡ് ഓയിൽ വിപണിയിലുണ്ടായ അനിശ്ചിതത്വം സംസ്ഥാനത്തെ റോഡ് നിർമ്മാണ മേഖലയെ സാരമായി ബാധിക്കുന്നു. ടാറിൻ്റെ വില ക്രമാതീതമായി ഉയർന്നതോടെ പൊതുമരാമത്ത്, തദ്ദേശ സ്വയംഭരണ വകുപ്പുകൾക്ക് കീഴിലുള്ള റോഡ് വികസന പ്രവർത്തനങ്ങൾ പൂർണ്ണമായും സ്തംഭനാവസ്ഥയിലായി.​ചാവക്കാട് മണ്ഡലത്തിലെ പ്രധാന പൊതുമരാമത്ത് റോഡുകൾ, ചാവക്കാട് എൻ.എച്ച്. ബൈപാസ്, തദ്ദേശ റോഡുകൾ എന്നിവയുടെ നിർമ്മാണത്തിനായി പലതവണ ടെൻഡർ ക്ഷണിച്ചെങ്കിലും കരാറുകാർ ഏറ്റെടുക്കാൻ തയ്യാറാകാത്തത് വലിയ പ്രതിസന്ധിയാണ് സൃഷ്ടിച്ചിരിക്കുന്നത്. നിലവിലെ എസ്റ്റിമേറ്റ് നിരക്കിൽ പണി പൂർത്തിയാക്കുന്നത് കനത്ത സാമ്പത്തിക നഷ്ടമുണ്ടാക്കുമെന്നതാണ് കരാറുകാരെ പിൻവലിയാൻ പ്രേരിപ്പിക്കുന്നത്.​പ്രശ്നത്തിൽ അടിയന്തര ഇടപെടൽ ആവശ്യപ്പെട്ട് എൻ.കെ. അക്ബർ എം.എൽ.എ പൊതുമരാമത്ത് വകുപ്പ് മന്ത്രിക്ക് നിവേദനം നൽകി. ടാറിൻ്റെ അധിക വില സർക്കാർ വഹിച്ചുകൊണ്ട് മുടങ്ങിക്കിടക്കുന്ന പ്രവൃത്തികൾ വേഗത്തിൽ പുനരാരംഭിക്കാൻ നടപടി വേണമെന്ന് അദ്ദേഹം ആവശ്യപ്പെട്ടു.​വിഷയത്തിൻ്റെ ഗൗരവം പൂർണ്ണമായി ബോധ്യപ്പെട്ടിട്ടുണ്ടെന്നും, നിർമ്മാണ പ്രതിസന്ധി പരിഹരിക്കാൻ അടുത്ത മന്ത്രിസഭാ യോഗത്തിൽ അനുകൂലമായ നിർണായക തീരുമാനം ഉണ്ടാകുമെന്നും മന്ത്രി എം.എൽ.എക്ക് ഉറപ്പുനൽകി.