കിരീടം നിലനിർത്തി ഇന്ത്യ – സഞ്ജു സാംസൺ പ്ലെയർ ഓഫ് ദ ടൂർണമെന്റ്

ഫൈനലിൽ നിർണ്ണായക പ്രകടനം കാഴ്ചവെച്ച പേസ് ബൗളർ ജസ്പ്രീത് ബുംറ പ്ലെയർ ഓഫ് ദ മാച്ച് പുരസ്കാരം നേടിയപ്പോൾ, ടൂർണമെന്റിലുടനീളം ബാറ്റിംഗിലും വിക്കറ്റ് കീപ്പിംഗിലും മിന്നും പ്രകടനം കാഴ്ചവെച്ച മലയാളി താരം സഞ്ജു സാംസൺ പ്ലെയർ ഓഫ് ദ ടൂർണമെന്റ് ആയി തിരഞ്ഞെടുക്കപ്പെട്ടു.

ടി20 ക്രിക്കറ്റ് ലോകത്തെ ചോദ്യം ചെയ്യപ്പെടാത്ത രാജാക്കന്മാരായി ഇന്ത്യ ഒരിക്കൽ കൂടി അധികാരമുറപ്പിച്ചു. ആവേശകരമായ ഫൈനൽ പോരാട്ടത്തിൽ ന്യൂസിലൻഡിനെ 96 റൺസിന് തകർത്ത് ഇന്ത്യ മൂന്നാം തവണയും ടി20 ലോകകപ്പ് കിരീടം ചൂടി. ഈ വിജയത്തോടെ ടി20 ലോകകപ്പ് കിരീടം നിലനിർത്തുന്ന ആദ്യ ടീമെന്ന ചരിത്രനേട്ടവും സ്വന്തം മണ്ണിൽ ലോകകപ്പ് നേടുന്ന ആദ്യ രാജ്യമെന്ന ബഹുമതിയും ടീം ഇന്ത്യ സ്വന്തമാക്കി.

​

​ടോസ് നഷ്ടപ്പെട്ട് ബാറ്റിംഗിനിറങ്ങിയ ഇന്ത്യ നിശ്ചിത 20 ഓവറിൽ 5 വിക്കറ്റ് നഷ്ടത്തിൽ 255 റൺസെന്ന പടുകൂറ്റൻ സ്കോറാണ് പടുത്തുയർത്തിയത്. ടി20 ലോകകപ്പ് ഫൈനൽ ചരിത്രത്തിലെ ഏറ്റവും ഉയർന്ന സ്കോറാണിത്. മലയാളി താരം സഞ്ജു സാംസണിന്റെ (46 പന്തിൽ 89) തകർപ്പൻ ഇന്നിംഗ്‌സാണ് ഇന്ത്യൻ സ്കോറിന് അടിത്തറയിട്ടത്. ഓപ്പണർ അഭിഷേക് ശർമ്മ (21 പന്തിൽ 52), ഇഷാൻ കിഷൻ (25 പന്തിൽ 54) എന്നിവരും മിന്നൽ അർദ്ധസെഞ്ചുറികളുമായി കളം നിറഞ്ഞതോടെ കിവി ബൗളർമാർ നിഷ്പ്രഭരായി. അവസാന ഓവറുകളിൽ ശിവം ദുബെ (8 പന്തിൽ 26*) നടത്തിയ വെടിക്കെട്ടും ഇന്ത്യൻ സ്കോർ 250 കടത്തി.

​

​256 റൺസ് എന്ന അസാധ്യ ലക്ഷ്യം പിന്തുടർന്നിറങ്ങിയ ന്യൂസിലൻഡിന് ഒന്നിനുപുറകെ ഒന്നായി വിക്കറ്റുകൾ നഷ്ടമായി. വെറും 159 റൺസിന് ന്യൂസിലൻഡ് നിര കൂടാരം കയറി. ന്യൂസിലൻഡിനായി ടിം സീഫെർട്ട് (52), ക്യാപ്റ്റൻ മിച്ചൽ സാന്റ്നർ (43) എന്നിവർ പൊരുതി നോക്കിയെങ്കിലും ഇന്ത്യൻ ബൗളിംഗ് നിരയുടെ കൃത്യതയ്ക്ക് മുന്നിൽ അവർക്ക് മറുപടിയുണ്ടായില്ല.

​ബൗളിംഗിൽ ജസ്പ്രീത് ബുംറ വീണ്ടും ഇന്ത്യയുടെ രക്ഷകനായി. 4 ഓവറിൽ വെറും 13 റൺസ് മാത്രം വഴങ്ങി 4 വിക്കറ്റുകൾ വീഴ്ത്തിയ ബുംറ കിവികളുടെ നട്ടെല്ലൊടിച്ചു. അക്സർ പട്ടേൽ മൂന്ന് വിക്കറ്റുകൾ വീഴ്ത്തി മികച്ച പിന്തുണ നൽകി. അവസാന വിക്കറ്റ് അഭിഷേക് ശർമ്മ വീഴ്ത്തിയതോടെ 1.3 ലക്ഷം കാണികൾ തിങ്ങിനിറഞ്ഞ സ്റ്റേഡിയം ആവേശക്കടലായി മാറി.

സ്കോർ ചുരുക്കത്തിൽ: ​ഇന്ത്യ: 255/5 (20 ഓവർ) ​ന്യൂസിലൻഡ്: 159/10 (19 ഓവർ)