ജങ്ക് ഫുഡുകൾ നിയന്ത്രിക്കുമെന്ന് പ്രതിജ്ഞയെടുത്ത് മുല്ലശ്ശേരി ജി.എച്ച്.എസ്.എസ് എൻ.എസ്.എസ് വിദ്യാർത്ഥികൾ

​മുല്ലശ്ശേരി: ആരോഗ്യകരമായ ഭക്ഷണശീലങ്ങൾ പ്രോത്സാഹിപ്പിക്കുന്നതിന്റെ ഭാഗമായി ജങ്ക് ഫുഡുകളുടെ ഉപയോഗം നിയന്ത്രിക്കുമെന്ന് പ്രതിജ്ഞയെടുത്ത് മുല്ലശ്ശേരി ഗവൺമെൻറ് ഹയർ സെക്കൻഡറി സ്കൂളിലെ എൻ.എസ്.എസ് വിദ്യാർത്ഥികൾ മാതൃകയായി. കേരളപ്പിറവി ദിനാചരണത്തോടനുബന്ധിച്ച് വിദ്യാലയത്തിൽ സംഘടിപ്പിച്ച സെമിനാറിലാണ് ആരോഗ്യകരമായ ഈ വേറിട്ട ആശയം വിദ്യാർത്ഥികൾ മുന്നോട്ടുവെച്ചത്.​സ്കൂൾ പ്രിൻസിപ്പൽ എ.എച്ച്. റീജ അധ്യക്ഷത വഹിച്ച യോഗത്തിൽ 24 കേരള ബറ്റാലിയൻ അസോസിയേറ്റ്ഡ് എൻ.സി.സി ഓഫീസർ മേജർ പി.ജെ. സ്റ്റൈജു സെമിനാർ ഉദ്ഘാടനം ചെയ്തു. ജങ്ക് ഫുഡുകൾ കർശനമായി നിയന്ത്രിക്കുന്നതും ഭക്ഷണത്തിൽ ഇലക്കറികളും പഴവർഗ്ഗങ്ങളും ഉൾപ്പെടുത്തുന്നതും ശരീരത്തിനും സമൂഹത്തിനും ഒരുപോലെ ഗുണകരമാണെന്ന് അദ്ദേഹം ഉദ്ഘാടന പ്രസംഗത്തിൽ ഓർമ്മിപ്പിച്ചു. കൂടാതെ, ജങ്ക് ഫുഡുകളുടെ ഉപയോഗത്തിനൊപ്പം തന്നെ മയക്കുമരുന്നിന്റെ ദുരുപയോഗവും സമൂഹമാധ്യമങ്ങളുടെ അതിപ്രസരവും ഇന്നത്തെ തലമുറ നിയന്ത്രിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.​ചടങ്ങിൽ എൻ.എസ്.എസ് കോഡിനേറ്റർ സി. ശ്യാമള കേരളപ്പിറവി ദിന സന്ദേശം നൽകി. തുടർന്ന് നടന്ന ചർച്ചകളിൽ അധ്യാപകരായ റെജൂല, സുനിത, വർഗ്ഗീസ് റിൻസൺ, രതീഷ് കൃഷ്ണൻ എന്നിവർ വിവിധ വിഷയങ്ങളെ ആസ്പദമാക്കി സംസാരിച്ചു.​സെമിനാറിന്റെ സമാപനത്തിൽ ജങ്ക് ഫുഡുകളുടെ ഉപയോഗം പൂർണ്ണമായും നിയന്ത്രിക്കുമെന്ന പ്രതിജ്ഞ മേജർ പി.ജെ. സ്റ്റൈജു വിദ്യാർത്ഥികൾക്ക് ചൊല്ലിക്കൊടുത്തു. പ്രതിജ്ഞയെടുത്ത വിദ്യാർത്ഥികൾക്ക് ആരോഗ്യകരമായ ശീലങ്ങളെ പ്രോത്സാഹിപ്പിക്കുന്നതിന്റെ പ്രതീകമായി മധുരനെല്ലിക്ക സമ്മാനമായി നൽകിയത് വേറിട്ടൊരു അനുഭവമായി മാറി. ദിനാചരണത്തിന്റെ ഭാഗമായി വിദ്യാലയത്തിൽ ചിത്രപ്രദർശനം, സംവാദം, ലേഖന മത്സരം, ക്വിസ് തുടങ്ങി വിവിധ മത്സരങ്ങളും പരിപാടികളും എൻ.എസ്.എസ് യൂണിറ്റിന്റെ നേതൃത്വത്തിൽ സംഘടിപ്പിച്ചിരുന്നു.