കാലം മായ്ക്കാത്ത ഓർമ്മ; ഗജരാജൻ ഗുരുവായൂർ കേശവന് സ്‌മരണാജ്ഞലി അർപ്പിച്ചു

ഗുരുവായൂർ : ഗജരാജൻ കേശവനെ അനുസ്‌മരിച്ചു. ദശമി ദിവസം രാവിലെ 7 മണിക്ക് ഗുരുവായൂർ ദേവസ്വം പുന്നത്തൂർ ആനത്താവളത്തിലെ ഗജവീരന്മാർ ഗജരാജൻ ഗുരുവായൂർ കേശവൻറെ ഛായാചിത്രവും വഹിച്ചുകൊണ്ട് തിരുവെങ്കിടാചലപതി ക്ഷേത്രാങ്കണത്തിൽ നിന്നും ഘോഷയാത്രയായി പുറപ്പെട്ട് ശ്രീവത്സം അതിഥി മന്ദിരത്തിന് മുന്നിലെത്തി ഗജരാജൻ ഗുരുവായൂർ കേശവൻ്റെ പ്രതിമയിൽ സ്‌മരണാജ്ഞലി അർപ്പിച്ചു. 1976 ഡിസംബർ മാസം 2-ാം തിയ്യതിയിലെ ഗുരുവായൂർ ഏകാദശി ദിവസമായിരുന്നു ഗുരുവായൂർ കേശവൻ ചരിഞ്ഞത്.

ദേവസ്വം ആനകളായ ബൽറാം, ചെന്താമരാക്ഷൻ, ഇന്ദ്രസെൻ, കൃഷ്ണ, നവനീത് കൃഷ്ണൻ, രവികൃഷ്ണൻ, വലിയ വിഷ്ണു, വിനായകൻ, ദേവി, ലക്ഷ്മികൃഷ്ണ എന്നീ ആനകൾ ചടങ്ങിൽ പങ്കെടുത്തു. കൊമ്പൻ ബൽറാം ഗുരുവായൂരപ്പന്റെ ഛായാചിത്രവും ഇന്ദ്രസെൻ കേശവന്റെ ഛായാചിത്രവും രവികൃഷ്ണൻ മഹാലക്ഷ്മിയുടെ ഛായാചിത്രവും വഹിച്ചു.

ഗുരുവായൂർ ദേവസ്വം ഭരണസമിതി അംഗങ്ങളും ഭക്തജനാവലിയും കേശവന്റെ പ്രതിമയിൽ പുഷ്‌പാർച്ചന നടത്തി. തുടർന്ന് പുന്നത്തൂർ കോട്ടയിൽ വെച്ച് ആനയൂട്ട് നടന്നു.