ദേശാന്തര പോരാട്ടത്തിന് ഇന്ത്യയെ പ്രതിനിധീകരിച്ച് ചാവക്കാടിന്റെ കായികതാരം

ഒരുമനയൂർ : ചാവക്കാടിന്റെ കായിക ഭൂപടത്തിന് അഭിമാനമായി ഒരുമനയൂർ സ്വദേശി നബ്ഹാൻ റഷീദ് അന്താരാഷ്ട്ര തലത്തിലേക്ക്. ശ്രീലങ്കയിൽ നടക്കുന്ന സൗത്ത് ഏഷ്യൻ ജുജിറ്റ്സു ചാമ്പ്യൻഷിപ്പിൽ നബ്ഹാൻ ഇന്ത്യയെ പ്രതിനിധീകരിക്കും. അണ്ടർ 18 വിഭാഗത്തിൽ 48 കിലോ കാറ്റഗറിയിലാണ് താരം മത്സരിക്കുന്നത്.​ദേശീയ കോച്ച് ആർ.ജെ അൻവർ മരക്കാറുടെ കീഴിൽ വെങ്കിടങ്ങ് എസ്.ടി.എം.എ അക്കാദമിയിൽ നിന്നാണ് നബ്ഹാൻ പരിശീലനം നേടിയത്. ഗാസിയാബാദിലെ ദേശീയ ട്രയൽസിലെ മികച്ച പ്രകടനം നബ്ഹാന് ഇന്ത്യൻ ടീമിലേക്കുള്ള വഴി തുറന്നു. ഇന്നും നാളെയുമായി (ഏപ്രിൽ 11, 12 ) നടക്കുന്ന മത്സരത്തിൽ പങ്കെടുക്കാൻ നബ്ഹാൻ കഴിഞ്ഞ ദിവസം ഡൽഹിയിൽ എത്തി ഇന്ത്യൻ ടീമിനോടൊപ്പം ചേർന്നു. നബ്ഹാന്റെ ഈ നേട്ടത്തിൽ നാട്ടുകാരും വെങ്കിടങ്ങ് എസ്.ടി.എം.എ അക്കാദമിയും ആഹ്ലാദത്തിലാണ്.