ചെമ്പൈ വേദിയിൽ യാദൃശ്ചികമായെത്തി സദസ്സിനെ ആഹ്ലാദഭരിതമാക്കി ഡോ. വി ആർ ദിലീപ് കുമാർ

ഏഴാം വയസ്സിൽ കെ എം കൃഷ്ണൻ നമ്പൂതിരിയുടെ കീഴിൽ സംഗീത പഠനം ആരംഭിച്ച ഡോ. ദിലീപ് കുമാർ മഹാനായ സംഗീത കലാചാര്യ മങ്ങാട് കെ നടേശൻ്റെ (ആകാശവാണി തൃശൂർ ടോപ്പ് ഗ്രേഡ് റിട്ടയേർഡ് സ്റ്റാഫ് ആർട്ടിസ്റ്റ്) കീഴിൽ പരിശീലനം തുടർന്നു. 19-ാം വയസ്സിൽ ഓൾ ഇന്ത്യ റേഡിയോയിൽ നിന്നും ദൂരദർശനിൽ നിന്നും കർണാടിക് വോക്കലിൽ എ ഗ്രേഡ് നേടി. രാജ്യത്തിനകത്തും പുറത്തുമുള്ള ഒട്ടുമിക്ക പ്രമുഖ വേദികളിലും വിവിധ മുതിർന്ന വിദ്വാന്മാരുടെ അകമ്പടിയോടെ സംഗീത പരിപാടികൾ അവതരിപ്പിച്ചിട്ടുണ്ട്. ഇന്ത്യൻ കൗൺസിൽ ഫോർ കൾച്ചറൽ റിലേഷൻസിൻ്റെ (ICCR) എംപാനൽ ചെയ്ത കലാകാരനാണ് ദിലീപ് കുമാർ. തൻ്റെ പ്രൊഫഷണൽ കരിയറിനൊപ്പം, 2005, 2014 വർഷങ്ങളിൽ യഥാക്രമം കേരളത്തിലെ കണ്ണൂർ സർവകലാശാലയിൽ നിന്ന് സംഗീതത്തിൽ എംഎയും പിഎച്ച്ഡിയും പൂർത്തിയാക്കി. 2020-ൽ തമിഴ്‌നാട് സെൻട്രൽ യൂണിവേഴ്‌സിറ്റിയിലെ സംഗീത വിഭാഗത്തിൽ ചേരുന്നതിന് മുമ്പ് കേരളത്തിലെ വിവിധ സർവകലാശാലകളിൽ അധ്യാപകനായി സേവനമനുഷ്ഠിച്ചിട്ടുണ്ട് ഇദ്ദേഹം. പിതാവ് തൃശൂർ ജില്ലയിലെ വെള്ളാട്ടഞ്ഞൂർ സ്വദേശി വി എൻ രാമൻ നമ്പൂതിരി. മാതാവ് ബാലാമണി.