സ്ത്രീശക്തി മുന്നോട്ട് കുടുംബശ്രീയുടെ ഉയരെ ക്യാമ്പയിന് തുടക്കം

ചാവക്കാട് : കേരളം സാമൂഹ്യ വിദ്യാഭ്യാസ രംഗങ്ങളിൽ കൈവരിച്ച മുന്നേറ്റം രാജ്യത്തിന് മാതൃകയായിട്ടുണ്ട്. എന്നാൽ സ്ത്രീകളുടെ തൊഴിൽ പങ്കാളിത്തവും സാമ്പത്തിക സ്വയംപര്യാപ്‌തതയും ഉറപ്പാക്കുമ്പോഴാണ് മുന്നേറ്റം പൂർണ്ണത നേടുന്നത്. കേരളം സാമൂഹ്യ വിദ്യാഭ്യാസ രംഗങ്ങളിൽ കൈവരിച്ച മുന്നേറ്റം രാജ്യത്തിന് മാതൃകയായിട്ടുണ്ട്. വിഷൻ 2031-ന്റെ ഭാഗമായി കേരളത്തിലെ സ്ത്രീകളുടെ തൊഴിൽ പങ്കാളിത്തം 50 ശതമാനമായി ഉയർത്തുക എന്ന ലക്ഷ്യത്തോടെ സംസ്ഥാനത്തൊട്ടാകെ കുടുംബശ്രിയുടെ നേത്യത്വത്തിൽ നടപ്പിലാക്കുന്ന ‘ഉയരെ – ഉയരട്ടെ കേരളം വളരട്ടെ പങ്കാളിത്തം’ എന്ന ജെൻഡർ ക്യാമ്പയിന് തൃശൂർ ജില്ലയിൽ തുടക്കം കുറിച്ചു. ദേശീയ ജെൻഡർ ക്യാമ്പയിനായ ‘നയീ ചേതന 4.0’-യുമായി സംയോജിപ്പിച്ചാണ് ഇത് നടപ്പിലാക്കുന്നത്.

സ്ത്രീകളിൽ സംരംഭകത്വം വളർത്തുക, ദാരിദ്ര്യ നിർമ്മാർജ്ജനം സാധ്യമാക്കുക, വേതനാധിഷ്‌ഠിത തൊഴിലുകൾക്ക് മുൻഗണന നൽകി സുരക്ഷിതമായ തൊഴിൽ സാഹചര്യങ്ങൾ ഉറപ്പാക്കുക എന്നിവ ഇതിന്റെ ഭാഗമാണ്. സ്ത്രീകളുടെ സാമ്പത്തികവും സാമൂഹികവും മാനസികവുമായ ഉന്നമനം ലക്ഷ്യമിട്ട്, അവർക്ക് സുരക്ഷിതമായ തൊഴിൽ സാഹചര്യങ്ങളും തുല്യനീതിയും ഉറപ്പാക്കാൻ ഒരുക്കുന്ന സമഗ്രമായ പദ്ധതിയാണ് ‘ഉയരെ’.

പൊതു ഇടങ്ങളിൽ ജൻഡർ പ്രതിജ്ഞ, ലിംഗാധിഷ്‌ഠിത അതിക്രമങ്ങൾക്കെതിരെയുള്ള പ്രചരണം, ലിംഗസമത്വം ഉറപ്പാക്കാൽ എന്നിവയ്ക്കായി ടോക്ക് ഷോ, പോസ്റ്റർ ക്യാമ്പയിൻ, അവബോധ ക്ലാസുകൾ, പരിശീലനങ്ങൾ എന്നിവ ഇതിൻ്റെ ഭാഗമായി സംഘടിപ്പിച്ചു. ജനുവരി 1 വൈകീട്ട് 6 മണിക്ക് ചാവക്കാട് ബ്ലാങ്ങാട് ബീച്ചിൽ വെച്ച് സാമൂഹ്യ നീതി – ഉന്നത വിദ്യാഭ്യാസ വകുപ്പ് മന്ത്രി ഡോ.ആർ ബിന്ദു ഉയരെ ജില്ലാതല ജെൻഡർ ക്യാമ്പയിൻ ഉദ്ഘാടനം നിർവ്വഹിച്ചു.

ചാവക്കാട് നഗരസഭ ചെയർപേഴ്‌സൺ എ. എച്ച്. അക്ബറിന്റെ അദ്ധ്യക്ഷതയിൽ നടന്ന ഉദ്ഘാടന ചടങ്ങിന് കുടുംബശ്രീ അസിസ്റ്റന്റ് ജില്ലാ മിഷൻ കോർഡിനേറ്റർ പ്രസാദ് കെ.കെ സ്വാഗതം പറഞ്ഞു. ഗുരുവായൂർ നഗരസഭ ചെയർപേഴ്‌സൺ സുനിത അരവിന്ദൻ എന്നിവർ പങ്കെടുത്തു. തൃശ്ശൂർ കുടുംബശ്രീ ജില്ലാമിഷൻ കോർഡിനേറ്റർ അഭിജിത്ത്, കെ. ദീപക് ഉയരെ പദ്ധതിയെ കുറിച്ച് വിശദീകരണം നൽകി. തൃശൂർ ജില്ലയിലെ തദ്ദേശ സ്വയംഭരണ സ്ഥാപനങ്ങളിൽ ജന പ്രതിനിധികളായി തെരഞ്ഞെടുക്കപ്പെട്ട സിഡിഎസ് ചെയർപേഴ്‌സന്മാർക്ക് ആദരവ് നൽകി.

ചാവക്കാട് നഗരസഭ വാർഡ് 23 കൗൺസിലർ, അഡ്വ. ഹിബ മിഷിഹാദ്, കുടുംബശ്രീ മിഷൻ സംസ്ഥാന പ്രോഗ്രാം മാനേജർ (ജെൻഡർ), ജസ്റ്റിൻ മാത്യു, കുടുംബശ്രീ തൃശ്ശൂർ അസിസ്റ്റന്റ്റ് ജില്ലാ മിഷൻ കോർഡിനേറ്റർ രാധാകൃഷ്‌ണൻ കെ , ചാവക്കാട് നഗരസഭ സിഡിഎസ് ചെയർപേഴ്‌സൺ, ജീന രാജീവ് എന്നിവർ ആശംസകൾ അറിയിച്ചു. കുടുംബശ്രീ ജില്ലാ മിഷൻ തൃശ്ശൂർ ജില്ലാ പ്രോഗ്രാം മാനേജർ (ജെൻഡർ) ഡോ. മോനിഷ യു നന്ദി പറഞ്ഞു.