ചാവക്കാട് ഉപജില്ലാ ശാസ്ത്രോത്സവത്തിന് സമാപനം; മമ്മിയൂർ ലിറ്റിൽ ഫ്ലവറിന് സമഗ്രാധിപത്യം

ചാവക്കാട്: ശാസ്ത്രബോധമുള്ള ഒരു പുതിയ തലമുറയെ വാർത്തെടുക്കുന്നതിൽ ശാസ്ത്രമേളകൾ വഹിക്കുന്ന പങ്ക് വലുതാണെന്ന് ഗുരുവായൂർ എം.എൽ.എ എൻ.കെ. അക്ബർ അഭിപ്രായപ്പെട്ടു. ചാവക്കാട് ഉപജില്ലാ ശാസ്ത്ര, ഗണിതശാസ്ത്ര, സാമൂഹ്യശാസ്ത്ര, പ്രവൃത്തിപരിചയ, ഐ.ടി മേളകളുടെ സമാപന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ചാവക്കാട് നഗരസഭ വൈസ് ചെയർമാൻ ബിൻസി സന്തോഷ്‌ അധ്യക്ഷത വഹിച്ച ചടങ്ങിൽ ബ്ലോക്ക് പഞ്ചായത്ത് പ്രസിഡന്റ് കെ.കെ. ഷിബു മുഖ്യാതിഥിയായിരുന്നു. നഗരസഭ സ്റ്റാൻഡിംഗ് കമ്മിറ്റി ചെയർമാൻമാരായ പി. യതീന്ദ്രദാസ്, കെ.എച്ച്. സലാം, കെ.പി. രഞ്ജിത്ത് കുമാർ, കൗൺസിലർ ലിഷ മത്രംകോട്ട്, എ.ഇ.ഒ ടി. സിന്ധു, എം.ആർ.ആർ.എം.എച്ച്.എസ്.എസ് പ്രിൻസിപ്പൽ എം.ഡി. ഷീബ, പ്രധാനാധ്യാപകൻ സുരേഷ് കെ. തോമസ്, പി.ടി.എ പ്രസിഡന്റ് ആർ.കെ. നൗഷാദ്, വൈസ് പ്രസിഡന്റ് അനിത പ്രസാദ്, അധ്യാപക സംഘടനാ പ്രതിനിധികൾ തുടങ്ങിയവർ സംസാരിച്ചു.

മേളയിൽ എൽ.പി, യു.പി, ഹൈസ്കൂൾ, ഹയർ സെക്കൻഡറി തുടങ്ങി എല്ലാ വിഭാഗങ്ങളിലും ഓവറോൾ ഒന്നാം സ്ഥാനം നേടി മമ്മിയൂർ ലിറ്റിൽ ഫ്ലവർ സ്കൂൾ സമഗ്രാധിപത്യം സ്ഥാപിച്ചു.

വിവിധ വിഭാഗങ്ങളിലെ വിജയികൾ:

• എൽ.പി വിഭാഗം: ലിറ്റിൽ ഫ്ലവർ ഇംഗ്ലീഷ് മീഡിയം എൽ.പി.എസ് മമ്മിയൂർ (ഒന്നാം സ്ഥാനം), എസ്.എച്ച്.സി.എൽ.പി.എസ് വൈലത്തൂർ (രണ്ടാം സ്ഥാനം).
• യു.പി വിഭാഗം: എൽ.എഫ്.സി.യു.പി.എസ് മമ്മിയൂർ (ഒന്നാം സ്ഥാനം), സെന്റ് ഫ്രാൻസിസ് യു.പി.എസ് വൈലത്തൂർ (രണ്ടാം സ്ഥാനം).
• ഹൈസ്കൂൾ വിഭാഗം: എൽ.എഫ്.സി.ജി.എച്ച്.എസ്.എസ് മമ്മിയൂർ (ഒന്നാം സ്ഥാനം), സെന്റ് സെബാസ്റ്റ്യൻസ് എച്ച്.എസ് ചിറ്റാട്ടുകര (രണ്ടാം സ്ഥാനം).
• ഹയർ സെക്കൻഡറി വിഭാഗം: എൽ.എഫ്.സി.ജി.എച്ച്.എസ്.എസ് മമ്മിയൂർ (ഒന്നാം സ്ഥാനം), ജി.എച്ച്.എസ്.എസ് മണത്തല (രണ്ടാം സ്ഥാനം).

വിദ്യാർത്ഥികളുടെ ശാസ്ത്രാഭിരുചിയും സർഗ്ഗാത്മകതയും പ്രകടമായ മത്സരങ്ങളിൽ മികച്ച പ്രകടനം കാഴ്ചവെച്ച വിജയികളെ സംഘാടകസമിതിയും അധ്യാപകരും അഭിനന്ദിച്ചു.