പുത്തൻകടപ്പുറം ബാപ്പു സെയ്ദ് സ്മാരക ഹെൽത്ത്‌ സെന്റർ ഉദ്ഘാടനം ചെയ്തു

ചാവക്കാട് : നഗരസഭ പുത്തൻ കടപ്പുറം ബാപ്പുസെയ്‌ദ് സ്മാരക ഹെൽത്ത്‌ സെന്റർ ഉദ്ഘാടനം ആരോഗ്യ കുടുംബക്ഷേമ വകുപ്പ് മന്ത്രി വീണാ ജോർജ്‌ നിർവഹിച്ചു. ഓൺലൈൻ ആയാണ് ഉദ്ഘാടനകർമ്മം നിർവഹിച്ചത്. ഗുരുവായൂർ എം.എൽ.എ എൻ.കെ. അക്ബർ ചടങ്ങിൽ അധ്യക്ഷത വഹിച്ചു. ചാവക്കാട് നഗരസഭ ചെയർപേഴ്സൺ ഷീജ പ്രശാന്ത് സ്വാഗതമാശംസിച്ചു.

പുത്തൻകടപ്പുറം ഹെൽത്ത്‌ സെന്റർ അർബൻ ഹെൽത്ത്‌ സെന്റർ ആയി ഉയർത്തുന്നതിനുള്ള നടപടികൾ സ്വീകരിച്ചിട്ടുള്ളതാണെന്നു ചെയർപേഴ്സൺ അറിയിച്ചു. അർബൻ ഹെൽത്ത്‌ സെന്റർ ആകുന്നതോടെ സ്ഥിരം ഡോക്ടറുടെ സേവനം, മരുന്ന് വിതരണം തുടങ്ങിയ സേവനങ്ങൾ ജനങ്ങൾക്ക് ലഭ്യമാകുന്നതാണ്.

പൊതുപ്രവർത്തകനും ചാവക്കാട് പഞ്ചായത്ത് മെമ്പറും, തിരുവത്ര സർവിസ് സഹകരണ ബാങ്കിന്റെ സ്ഥാപകനും, പാടശേഖര സമിതിയുടെ സാരഥിയുമായിരുന്ന ബാപ്പു സെയ്തിന്റെ സ്മരണാർത്ഥമാണ് ഹെൽത്ത്‌ സെന്ററിന് ബാപ്പു സെയ്ദ് സ്മാരക ഹെൽത്ത്‌ സെന്റർ എന്ന പേര് നൽകിയതെന്ന് എം.എൽ.എ അറിയിച്ചു.

ഗുരുവായൂർ നഗരസഭ ചെയർമാനും ചേമ്പർ ഓഫ് മുനിസിപ്പൽ ചെയർമാനുമായ എം. കൃഷ്ണദാസ്, നഗരസഭ വൈസ് ചെയർമാൻ കെ. കെ. മുബാറക്, പൊതുപ്രവർത്തകരായ ടി.ടി. ശിവദാസൻ, അഡ്വ. മുഹമ്മദ്‌ ബഷീർ, ബൈജു. കെ. ആർ, സുരേഷ് കുമാർ, കാദർ ചക്കര, ടി. പി. ഷാഹു, നഗരസഭ സ്ഥിരം സമിതി അദ്ധ്യക്ഷരായ ഷാഹിന സലീം, അബ്ദുൾ റഷീദ് പി. എസ്, ബുഷറ ലത്തീഫ്, മുഹമ്മദ് അൻവർ, പ്രസന്ന രണദിവെ, നഗരസഭ മുൻ ചെയർമാനും കൗൺസിലറുമായ എം. ആർ. രാധാകൃഷ്ണൻ എന്നിവർ ആശംസകൾ അറിയിച്ചു.

നഗരസഭ സെക്രട്ടറി കെ. ബി. വിശ്വനാഥൻ റിപ്പോർട്ട്‌ അവതരിപ്പിച്ചു. നഗരസഭ കൗൺസിലർമാർ, പൊതുപ്രവർത്തകർ എന്നിവരും പങ്കെടുത്തു. ചാവക്കാട് താലൂക് ആശുപത്രി സൂപ്രണ്ട് ശ്രീജ. പി. കെ നന്ദി പറഞ്ഞു.