ദേശീയപാത നിർമ്മാണം പൂർത്തിയാവാതെ നാട്ടികയിൽ ടോൾ പിരിവ് : ജില്ലാ കളക്ടർക്ക് ഗീതാ ഗോപി എംഎൽഎ പരാതി നൽകി

തൃപ്രയാർ: ദേശീയപാത 66-ലെ നാട്ടിക ടോൾ ബൂത്തിൽ ഒക്ടോബർ 8 മുതൽ ടോൾ പിരിവ് ആരംഭിക്കാനുള്ള നീക്കത്തിനെതിരെ നാട്ടിക എം.എൽ.എ ഗീതാ ഗോപി ജില്ലാ കളക്ടർ ശിഖ സുരേന്ദ്രന് കത്ത് നൽകി. ഹൈവേയുടെ നിർമ്മാണ പ്രവർത്തനങ്ങൾ പൂർത്തിയാക്കാതെ ടോൾ പിരിവ് തുടങ്ങുന്നത് ജനങ്ങളോടുള്ള വെല്ലുവിളിയാണെന്ന് കത്തിൽ ചൂണ്ടിക്കാണിക്കുന്നു. ​യാത്രക്കാരുടെയും പ്രദേശവാസികളുടെയും ജീവന്റെ സുരക്ഷ ഉറപ്പാക്കാൻ ദേശീയപാത അതോറിറ്റി യാതൊരു നടപടിയും സ്വീകരിച്ചിട്ടില്ല. പ്രദേശത്തെ പാലങ്ങൾ, അപ്രോച്ച് റോഡുകൾ, അടിപ്പാതകൾ (അണ്ടർപാസുകൾ) എന്നിവയുടെ നിർമ്മാണം ഇനിയും പൂർത്തിയായിട്ടില്ല. ഡ്രൈനേജ് സിസ്റ്റം, ഡിവൈഡറുകൾ, സർവ്വീസ് റോഡുകൾ എന്നിവയുടെ പണികളും പകുതിവഴിയിൽ നിലച്ചിരിക്കുകയാണ്. ​ഇത്തരം ഗുരുതരമായ പോരായ്മകൾ നിലനിൽക്കെ, എൻഎച്ച്എഐയുടെ മുൻ നിലപാടുകൾക്ക് വിരുദ്ധമായി ടോൾ പിരിവ് തുടങ്ങാനുള്ള നീക്കം അടിയന്തരമായി നിർത്തിവെക്കാൻ ഇടപെടണമെന്ന് എം.എൽ.എ ആവശ്യപ്പെട്ടു. ​സി.പി.ഐ നാട്ടിക മണ്ഡലം സെക്രട്ടറി കെ. എം. കിഷോർ കുമാർ, ജില്ലാ പഞ്ചായത്ത് അംഗം കെ. പി. സന്ദീപ് എന്നിവർക്കൊപ്പമാണ് എം.എൽ.എ കളക്ടർക്ക് നിവേദനം നൽകിയത്.