വാഹന തട്ടിപ്പ് : പ്രതികളെ കസ്റ്റഡിയില്‍ വാങ്ങി – പണയപ്പെടുത്തിയ പത്ത് വാഹനങ്ങള്‍ കണ്ടെടുത്തു

ഗുരുവായൂര്‍ : വാഹനങ്ങള്‍ വാടകക്കെടുത്ത് പണയപ്പെടുത്തുന്ന സംഘത്തില്‍ അറസ്റ്റിലായി റിമാന്‍ഡില്‍ കഴിയുന്ന പ്രതികളെ പോലീസ് കസ്റ്റഡിയില്‍ വാങ്ങി. പ്രതികളെ കൂടുതല്‍ ചോദ്യം ചെയ്തതിനെ തുടര്‍ന്ന് ഇവര്‍ പണയപ്പെടുത്തിയ പത്ത് വാഹനങ്ങള്‍ കണ്ടെടുത്തു. മലപ്പുറം വേങ്ങര ചക്കുടല്‍ വീട്ടില്‍ അഷ്‌റഫ്(33), പഴയന്നൂര്‍ താവളത്തില്‍ ഷാനവാസ്(32), തൃത്താല പുഴക്കന്‍ കുഞ്ഞുമുഹമ്മദ് (27) എന്നിവരെയാണ് ഗുരുവായൂര്‍ പൊലീസ് അറസ്റ്റ് ചെയ്തത്. കണ്ടാണശേരി നമ്പഴിക്കാട് സ്വദേശി പോക്കാകില്ലത്ത് രഹീഷിന്റെ പരാതിയെ തുടര്‍ന്ന് നടത്തിയ അന്വേഷണത്തിലാണ് പ്രതികളെ അറസ്റ്റ് ചെയ്തത്. കുഞ്ഞിമുഹമ്മദും ഷാനവാസും ചേര്‍ന്ന് വാഹനങ്ങള്‍ വാടകക്കെടുക്കുകയും ഇത് അഷ്‌റഫിന് പണയം വെച്ച് പണം വാങ്ങുകയുമാണ് ചെയ്തിരുന്നത്. ഇങ്ങിനെ ലഭിക്കുന്ന വാഹനങ്ങള്‍ ഉപയോഗിച്ച് മണല്‍, സ്പിരിറ്റ് എന്നിവ കടത്താറുണ്ടെന്നും പൊലീസ് പറഞ്ഞു. കഴിഞ്ഞ ദിവസം കുന്നംകുളം, ഗുരുവായൂര്‍ ഭാഗങ്ങളില്‍ നിന്നാണ് പ്രതികളെ അറസ്റ്റ് ചെയ്തത്. സംഭവത്തില്‍ മൂന്ന് പേരെകൂടി പിടികിട്ടാനുണ്ടെന്നും പോലീസ് പറഞ്ഞു.