വിഷുദിനത്തിൽ സമൃദ്ധിയുടെ വിളവെടുപ്പ്; വാസന്തിന്റെ ജൈവകൃഷി ശ്രദ്ധേയമാകുന്നു

ചാവക്കാട്: വിഷുദിനത്തിൽ നന്മയുടെയും സമൃദ്ധിയുടെയും സന്ദേശവുമായി ചാവക്കാട് നഗരസഭയിലെ വാർഡ്‌ 9 ൽ ജൈവപച്ചക്കറി വിളവെടുപ്പ് നടത്തി. നഗരസഭ ഒമ്പതാം വാർഡിലെ ആച്ചാണത്ത് റോഡിന് സമീപം നഗരസഭാ ഹെൽത്ത് ജീവനക്കാരനായ വാസന്തിന്റെ തോട്ടത്തിലാണ് വിഷുപ്പുലരിയിൽ വിളവെടുപ്പ് നടന്നത്.​വാർഡ് കൗൺസിലർ ഷെർമിള സത്താർ വിളവെടുപ്പ് ഉദ്ഘാടനം ചെയ്തു. ആച്ചാണത്ത് റോഡിന് സമീപമുള്ള ഏകദേശം 20 സെന്റ് സ്ഥലത്ത് കഴിഞ്ഞ ആറുമാസമായി വാസന്ത് നടത്തിവരുന്ന കഠിനാധ്വാനത്തിന്റെ ഫലമാണ് ഈ മികച്ച വിളവ്.​പൂർണ്ണമായും ജൈവരീതിയിൽ തയ്യാറാക്കിയ തോട്ടത്തിൽ ചീര, ​വഴുതന, ​കൈപ്പക്ക (പാവയ്ക്ക), തക്കാളി എന്നിവയാണ് പ്രധാനമായും കൃഷി ചെയ്തിരിക്കുന്നത്. ​ചടങ്ങിൽ ചാവക്കാട് നഗരസഭ ഹെൽത്ത് സൂപ്പർവൈസർ (HS) ദിലീപ്, കെ.വി., സത്താർ, സിമ്പൻ എന്നിവർ പങ്കെടുത്തു. രാസകീടനാശിനികളില്ലാത്ത പച്ചക്കറികൾ സ്വന്തം മണ്ണിൽ വിളയിച്ചെടുക്കുന്ന വാസന്തിന്റെ ഈ കൃഷിരീതി നാട്ടുകാർക്കും മറ്റ് ജീവനക്കാർക്കും മാതൃകയാണ്.