വെറുതെ പാടിയ പക്ഷി’ കവിതാസമാഹാരം പ്രകാശനം ചെയ്തു

പുന്നയൂർക്കുളം: അമേരിക്കൻ മലയാളി എഴുത്തുകാരൻ അബ്ദുൾ പുന്നയൂർക്കുളത്തിന്റെ പുതിയ കവിതാസമാഹാരമായ ‘വെറുതെ പാടിയ പക്ഷി’ പ്രകാശനം ചെയ്തു. മഹാകവി നാലപ്പാട്ട് നാരായണമേനോന്റെ 139-ാം ജന്മദിനാഘോഷത്തോടനുബന്ധിച്ച് പുന്നയൂർക്കുളം കുന്നത്തൂർ മന ഹെറിറ്റേജിൽ വെച്ചായിരുന്നു ചടങ്ങ്.​പ്രശസ്ത കവി മധുസൂദനൻ നായർ, സാഹിത്യ അക്കാദമി പ്രസിഡണ്ട് കല്പറ്റ നാരായണന് പുസ്തകം നൽകി പ്രകാശനം നിർവഹിച്ചു. ചടങ്ങിൽ ടി. മോഹൻ ബാബു അധ്യക്ഷത വഹിച്ചു.​പി.ആർ. നാഥൻ, ആലങ്കോട് ലീലാകൃഷ്ണൻ, ടി. കൃഷ്ണദാസ്, ഉമ്മർ അറക്കൽ, ബാഹുലേയൻ താമരശ്ശേരി, സക്കറിയ തുടങ്ങിയ പ്രമുഖർ ചടങ്ങിൽ സംബന്ധിച്ചു. സതീഷ്‌കുമാർ എ.കെ. സ്വാഗതവും സരിത അശോകൻ നാലപ്പാട്ട് നന്ദിയും പറഞ്ഞു.​പുസ്തക പ്രകാശനത്തോടൊപ്പം അബ്ദുൾ പുന്നയൂർക്കുളത്തിന്റെ നേതൃത്വത്തിൽ പുന്നയൂർക്കുളത്തും പരിസര പ്രദേശങ്ങളിലുമുള്ള എഴുത്തുകാരുടെ പുസ്തകങ്ങളുടെ പ്രദർശനവും ചടങ്ങിന്റെ ഭാഗമായി നടന്നു.