കമലഹാസൻ സിനിമാലോകത്തേക്ക് കൈപിടിച്ചുയർത്തിയ സംസ്ഥാനത്തെ ഏറ്റവും ഉയരമുള്ള മനുഷ്യരിലൊരാളായ പാവറട്ടി സ്വദേശി കമറുദ്ധീൻ ദുരിതങ്ങളില്ലാത്ത ലോകത്തേക്ക് യാത്രയായി

പാവാറട്ടി : കമലഹാസൻ സിനിമാലോകത്തേക്ക് കൈപിടിച്ചുയർത്തിയ സംസ്ഥാനത്തെ ഏറ്റവും ഉയരമുള്ള മനുഷ്യരിലൊരാളായ പാവറട്ടി സ്വദേശി കമറുദ്ധീൻ (61) അന്തരിച്ചു.  7.1 അടിയായിരുന്നു അദ്ദേഹത്തിന്റെ ഉയരം.  മഞ്ഞപ്പിത്തം ബാധിച്ച് ചികിത്സയിലിരിക്കെയാണ് മരണം. 

ഉയരക്കൂടുതൽ ജീവിതത്തിൽ ദുരിതമായി തീർന്ന കമറുവിനു ചിലപ്പോഴൊക്കെ അത് അനുഗ്രഹവുമായി. ഹിന്ദി, തമിഴ്, കന്നട, തെലുങ്ക്, മലയാളം എന്നീ ഭാഷകളിലായി ഇരുപത്തിയഞ്ചോളം സിനിമകളിൽ അഭിനയിച്ചിട്ടുണ്ട്. സൂപ്പർ താരങ്ങളായ രജനികാന്ത്, അനിൽ കപൂർ എന്നിവർക്കൊപ്പം സ്‌ക്രീൻ ഷെയർ ചെയ്ത കമറുദ്ധീൻ വ്യാഴാഴ്ച പുലർച്ചെയാണ് അന്ത്യശ്വാസം വലിച്ചത്.

വിനയൻ്റെ അത്ഭുത ദ്വീപായിരുന്നു അവസാന ചിത്രം. കിരാതം, ഒന്നാം പ്രതി ഒളിവിൽ, ശബ്ദവും വെളിച്ചവും, ജയ് വേതാളം, ബ്രഹ്മ രക്ഷസ് എന്നീ ചിത്രങ്ങളിലും അദ്ദേഹം അഭിനയിച്ചിട്ടുണ്ട്. കമൽഹാസൻ്റെ തമിഴ് ചിത്രമായ ഉയർന്ന ഉള്ളം എന്ന ചിത്രത്തിലൂടെയാണ് അദ്ദേഹം അരങ്ങേറ്റം കുറിച്ചത്.

മാധ്യമ പ്രവർത്തകരായ പോൾസൺ പാവറട്ടി, ഷാജൻ മാസ്റ്റർ എന്നിവരുമായി നടത്തിയ വീഡിയോ അഭിമുഖത്തിൽ കമറുദ്ദീൻ താൻ എങ്ങനെ സിനിമാലോകത്തേക്ക് കടന്നുവെന്ന് വിശദീകരിച്ചിരുന്നു. “എൻ്റെ ഉയരം കാരണം ഞാൻ എൻ്റെ പ്രദേശത്ത് ഒരു പരിഹാസപാത്രമായി മാറിയിരുന്നു, 1986-ൽ ജോലി തേടി ഞാൻ ചെന്നൈയിലേക്ക് (അന്ന് മദ്രാസ്) പോയി. അവിടെയുള്ള രണ്ട് ദിനപത്രങ്ങൾ ഞാൻ നഗരത്തിൽ കറങ്ങിനടക്കുന്ന ചിത്രങ്ങൾ പ്രസിദ്ധീകരിച്ചു. ഒരു ദിവസം, ഞാൻ കോടമ്പാക്കത്ത് ഒരു റോഡിലൂടെ നടക്കുമ്പോൾ, ഒരു മാരുതി കാർ എൻ്റെ അടുത്ത് നിർത്തി, അകത്തിരുന്നയാൾ എന്നോട് ചോദിച്ചു, “നീ കമരുദ്ധേ-എന്നാണ്, അല്ലേ?”. നോക്കിയപ്പോൾ എൻ്റെ കണ്ണുകളെ എനിക്ക് വിശ്വസിക്കാനായില്ല, അത് കമലഹാസനായിരുന്നു. എനിക്ക് സിനിമയിൽ അഭിനയിക്കാൻ താൽപ്പര്യമുണ്ടോ എന്ന് അദ്ദേഹം എന്നോട് ചോദിച്ചു, ഞാൻ ഉടൻ സമ്മതിച്ചു.

രജനികാന്തിൻ്റെ പണക്കാരൻ, ധർമ്മത്തിൻ തലവൻ എന്നീ ചിത്രങ്ങളിൽ അഭിനയിച്ചു. ഹിന്ദിയിൽ രഖ് വാലയിൽ അഭിനയിച്ചു. എന്നാൽ യാത്രാ പ്രശ്‌നങ്ങളെ തുടർന്ന് ചെന്നൈയിൽ നിന്ന് മടങ്ങേണ്ടി വന്നു. ഹൃദയസംബന്ധമായ പ്രശ്‌നങ്ങളും തുടർച്ചയായി നിൽക്കാനുള്ള ബുദ്ധിമുട്ടുകളും അദ്ദേഹത്തിന് അനുഭവപ്പെട്ടു. തിരിച്ചെത്തിയ ശേഷം ലോട്ടറിയും ശീതളപാനീയങ്ങളും വിൽക്കാൻ തുടങ്ങി. സെക്യൂരിറ്റി ജീവനക്കാരനായും ജോലി ചെയ്തു. ജീവിതാവസാനം വരെ മരുന്നുകൾ വാങ്ങാൻ പോലും ബുദ്ധിമുട്ടി. ഭാര്യ : ലൈല. മക്കൾ:  റൈഹാനത്, റജീന.