മണത്തലയിലെ ഫ്ലൈഓവർ – ആശങ്കയകറ്റാൻ എം എൽ എ ഇടപെടുന്നു

ചാവക്കാട് : നാഷണൽ ഹൈവേ 66 നവീകരണവുമായി ബന്ധപ്പെട്ട് ചാവക്കാട് മണത്തല മുല്ലത്തറയിലെ ഫ്ലൈ ഓവർ നിർമ്മാണം, മന്ദലംകുന്നിലെ അടിപ്പാത നിർമ്മാണം എന്നിവയിൽ പ്രദേശവാസികളുടെ ആശങ്ക പരിഹരിക്കുന്നതിനായി എം എൽ എ ഇടപെടുന്നു. നാഷണൽ ഹൈവേ അതോറിറ്റി പ്രോജക്ട് ഡയറക്ടറുമായി ഈ മാസം 23 കാലത്ത് 11 മണിക്ക് ചാവക്കാട് പിഡബ്ല്യുഡി റെസ്റ്റ് ഹൗസിൽ എൻ കെ അക്ബർ എംഎൽഎയുടെ അധ്യക്ഷതയിൽ യോഗം ചേരുമെന്ന് എം എല്‍ എ ഓഫീസ് അറിയിച്ചു.

ചാവക്കാട് മണത്തല മുല്ലത്തറ ജംഗ്ഷനിൽ നിർമിക്കുന്ന മേൽപാലത്തിന്റെ (flyover ) ഇരുവശങ്ങളും തട മതിൽ (retaining wall ) കെട്ടി അടക്കുന്നത് ഒഴിവാക്കണമെന്ന ആവശ്യം ഉന്നയിച്ച് സാമൂഹ്യമാധ്യങ്ങളിൽ സജീവ ചർച്ച നടന്നു കൊണ്ടിരിക്കുന്ന പശ്ചാതലത്തിലാണ് എം എൽ എ യുടെ ഇടപെടൽ.

ദേശീയപാതാ വികസന പ്രവർത്തനങ്ങളുടെ ഭാഗമായി കെട്ടിടങ്ങൾ പൊളിച്ചു നീക്കി റോഡ് ഒരുക്കം പുരോഗമിച്ചു കൊണ്ടിരിക്കുകയാണ്. മുല്ലത്തറ ജംഗ്ഷനിലെ പറമ്പൻസ് ഹോട്ടലാണ് അവസാനമായി പൊളിച്ചു നീക്കിയത്. ഇവിടെ മേൽപ്പാലത്തിന്റെ പില്ലർ വർക്കുകൾ ആരംഭിച്ചിട്ടുണ്ട്.

ദേശീയപാതയിലെ നിരവധി വാഹനങ്ങൾ ഒരേസമയം അമിത വേഗതയിൽ സഞ്ചരിക്കും എന്നതിനാൽ മേൽപാലത്തിന് കൂടുതൽ ബലം ലഭിക്കുന്നതിനായി രണ്ടറ്റങ്ങളിൽ നിന്നും ഇരുവശങ്ങളിലുമായി മതിൽ നിർമിക്കുന്ന (retaining wall ) രീതിയാണ് സ്വീകരിച്ചു വരുന്നത്. ഇത്തരത്തിൽ തട മതിൽ കെട്ടിയുള്ള ഫ്ലൈഓവറാണ് മണത്തല മുല്ലത്തറയിലും വരാനിരിക്കുന്നത്.

നൂറുകണക്കിന് വിദ്യാർത്ഥികൾ പഠിക്കുന്ന മണത്തല ഗവ ഹയർസെക്കണ്ടറി സ്‌കൂളും പതിനായിരങ്ങൾ എത്തുന്ന നേർച്ചാഘോഷം നടക്കുന്ന മണത്തല ജുമാമസ്ജിദും ഇവിടെയാണ്‌ ഉള്ളത്. തട മതിൽ കെട്ടിയുള്ള രീതിയിൽ മേൽപ്പാലം പണിതാൽ കാൽനട യാത്രികരായ വിദ്യാർത്ഥികളും നാട്ടുകാരും ദുരിതത്തിലാകും.

മേഖലയിലെ പ്രധാന വിനോദ സഞ്ചാര കേന്ദ്രങ്ങളായ ബ്ലാങ്ങാട് ബീച്ച്, നാലുമണിക്കാറ്റ്, മറൈൻ വേൾഡ്, ആന ക്കോട്ട, ചേറ്റുവ കണ്ടൽ ദ്വീപുകൾ, തീർത്ഥാടന കേന്ദ്രങ്ങളായ ഗുരുവായൂർ ക്ഷേത്രം, പാലയൂർ ചർച്ച്‌ എന്നിവയിലേക്കും ഇതുവഴിയുള്ള സർവീസ് റോഡ് ഉപയോഗിക്കുന്ന യാത്രക്കാരുടെ എണ്ണവും അനേകമാണ്.

ഇവിടെ തട മതിൽ ( retaining wall ) ഒഴിവാക്കിയുള്ള സാങ്കേതികവിദ്യ ഉപയോഗപ്പെടുത്തി മേൽപ്പാലം (flyover ) പണിയണമെന്ന ആവശ്യമാണ് നാട്ടുകാർ ഉയർത്തുന്നത്.