ഒരുമനയൂർ: ദേശീയപാത 66-ന്റെ നിർമ്മാണ പ്രവർത്തനങ്ങളുമായി ബന്ധപ്പെട്ട് ഒരുമനയൂർ ഗ്രാമപഞ്ചായത്തിലും പരിസരപ്രദേശങ്ങളിലും ജനങ്ങൾ ഗുരുതരമായ ബുദ്ധിമുട്ടുകൾ നേരിടുന്ന സാഹചര്യത്തിൽ, ദേശീയപാത അതോറിറ്റിക്കും കരാറുകാർക്കുമെതിരെ ശക്തമായ പ്രതിഷേധവുമായി ഒരുമനയൂർ ഗ്രാമപഞ്ചായത്ത് കമ്മിറ്റി. നിലവിലുള്ള പ്രശ്നങ്ങൾക്ക് അടിയന്തര പരിഹാരം കാണണമെന്നാവശ്യപ്പെട്ട് കമ്മിറ്റി പ്രമേയം പാസാക്കി.
സ്റ്റാൻഡിംഗ് കമ്മിറ്റി ചെയർപേഴ്സൺ ഷക്കീർ നിർദേശിക്കുകയും, വൈസ് പ്രസിഡന്റ് നഷറ മുഹമ്മദ് അവതരിപ്പിക്കുകയും ചെയ്ത പ്രമേയമാണ് പഞ്ചായത്ത് കമ്മിറ്റി ഐകകണ്ഠ്യേന പാസാക്കിയത്.
ഹൈവേ നിർമ്മാണത്തിന്റെ ഭാഗമായി നിർമിച്ച താൽക്കാലിക സർവീസ് റോഡുകളും ഓടകളും ശാസ്ത്രീയമല്ലാത്തതിനാൽ മഴവെള്ളം യഥാസമയം ഒഴുകിപ്പോകുന്നില്ല. സർവീസ് റോഡുകളിൽ വെള്ളം കെട്ടിക്കിടന്ന് റോഡുകൾ വ്യാപകമായി തകർന്നു. ഓടകൾ അടഞ്ഞുകിടക്കുന്നതിനാൽ റോഡിനോട് ചേർന്നുള്ള നിരവധി വീടുകളിലേക്ക് വെള്ളം കയറുന്ന അവസ്ഥയാണ്. മഴക്കെടുതിയെ തുടർന്ന് രണ്ട് തവണയാണ് ഒരുമനയൂർ പഞ്ചായത്ത് ഓഫീസിനുള്ളിൽ വെള്ളം കയറിയത്. ഇതുമൂലം ഓഫീസിലെ കമ്പ്യൂട്ടറുകൾക്കും പ്രധാനപ്പെട്ട ഔദ്യോഗിക രേഖകൾക്കും കേടുപാടുകൾ സംഭവിക്കുകയും ചെയ്തു.
കഴിഞ്ഞ മെയ് 15-ന് ജില്ലാ കളക്ടർ വിളിച്ചു ചേർത്ത യോഗത്തിൽ, മെയ് 30-നകം ആവശ്യമായ ഡ്രെയിനേജ്-റോഡ് നിർമ്മാണ പ്രവർത്തനങ്ങൾ പൂർത്തിയാക്കാമെന്ന് ദേശീയപാത അതോറിറ്റി ഉദ്യോഗസ്ഥർ ഉറപ്പുനൽകിയിരുന്നു. എന്നാൽ കാലാവധി കഴിഞ്ഞിട്ടും യാതൊരുവിധ ഫലപ്രദമായ നടപടിയും സ്വീകരിച്ചിട്ടില്ല. ഉദ്യോഗസ്ഥരുടെ അനാസ്ഥയും കരാറുകാരുടെ വീഴ്ചയും പ്രദേശവാസികളുടെ ദുരിതം ഇരട്ടിയാക്കിയിരിക്കുകയാണ്.
ദേശീയപാത 66 കടന്നുപോകുന്നതോടെ ഒരുമനയൂർ പഞ്ചായത്ത് രണ്ടായി വിഭജിക്കപ്പെട്ട അവസ്ഥയിലാണ്. കാൽനടയാത്രക്കാർക്കും വിദ്യാർത്ഥികൾക്കും സുരക്ഷിതമായി റോഡ് മുറിച്ചുകടക്കാൻ നിലവിൽ യാതൊരു സംവിധാനവുമില്ല.
പഞ്ചായത്തിലെ നാല് വിദ്യാഭ്യാസ സ്ഥാപനങ്ങൾ, പഞ്ചായത്ത് ഓഫീസ്, വില്ലേജ് ഓഫീസ്, പ്രാഥമികാരോഗ്യ കേന്ദ്രം (PHC), മറ്റ് സർക്കാർ-പൊതു സ്ഥാപനങ്ങൾ
എന്നിവിടങ്ങളിലേക്ക് എത്തുന്നതിന് പൊതുജനങ്ങളും കുട്ടികളും ജീവൻ പണയപ്പെടുത്തി ദേശീയപാത മുറിച്ചുകടക്കേണ്ട സാഹചര്യമാണുള്ളത്.
ഒറ്റത്തെങ് മുതൽ തെക്കേ ബൈപാസ് വരെയുള്ള റോഡ് പൂർണ്ണമായും കുണ്ടും കുഴിയുമായി അപകടാവസ്ഥയിലാണ്. ഒരുമനയൂർ നിവാസികൾ നിത്യോപയോഗ സാധനങ്ങൾക്കും ചികിത്സയ്ക്കുമായി പൂർണ്ണമായും ആശ്രയിക്കുന്നത് നിരവധി സർക്കാർ-സ്വകാര്യ ആശുപത്രികളുള്ള ചാവക്കാട് നഗരത്തെയാണ്. ചാവക്കാട് – ചേറ്റുവ റോഡിന്റെ ഈ ശോചനീയാവസ്ഥ വർഷങ്ങളായി ഭരണാധികാരികളുടെയും ഉദ്യോഗസ്ഥരുടെയും ശ്രദ്ധയിൽപ്പെടുത്തിയിട്ടും യാതൊരുവിധ പരിഹാരവും ഉണ്ടായിട്ടില്ലെന്ന് പ്രമേയത്തിൽ കുറ്റപ്പെടുത്തുന്നു.
ഒരുമനയൂർ പഞ്ചായത്തിലെ വെള്ളക്കെട്ട്, തകർന്ന ഡ്രെയിനേജ്, സർവീസ് റോഡ് തകർച്ച എന്നിവയ്ക്ക് ദേശീയപാത അതോറിറ്റി അടിയന്തരമായി ശാശ്വത പരിഹാരം കാണുക. വിദ്യാർത്ഥികളുടെയും പൊതുജനങ്ങളുടെയും സുരക്ഷ ഉറപ്പാക്കാൻ അടിയന്തരമായി പഞ്ചായത്തിൽ ഒരു ഫുട് ഓവർ ബ്രിഡ്ജ് (Foot Over Bridge)** അനുവദിക്കുക എന്നീ ആവശ്യങ്ങൾക്കൊപ്പം അധികൃതർ മുൻപ് നൽകിയ ഉറപ്പുകൾ പാലിക്കാത്തതിലും ജനങ്ങളെ ദുരിതത്തിലാക്കുന്നതിലും ദേശീയപാത അതോറിറ്റിയുടെയും കരാറുകാരുടെയും നിലപാടിനെതിരെ ശക്തമായി പ്രതിഷേധിക്കുന്നതായി പഞ്ചായത്ത് കമ്മിറ്റി അറിയിച്ചു.
Comments are closed.