കോട്ടപ്പടി പള്ളിയിൽ ദുക്റാന തിരുനാൾ ആഘോഷിച്ചു

കോട്ടപ്പടി: കോട്ടപ്പടി സെൻറ് ലാസ്സേഴ്സ് ദൈവാലയത്തിൽ മാർത്തോമാ ശ്ലീഹായുടെ ദുക്റാന തിരുനാൾ ഭക്തിആദരപൂർവ്വം ആഘോഷിച്ചു. തിരുനാൾ ദിനത്തിൽ രാവിലെ 7 മണിക്ക് നടന്ന ആഘോഷമായ തിരുനാൾ ദിവ്യബലിക്ക് റവ. ഫാ. ജയ്സൺ ചൊവ്വല്ലൂർ സി.എം.ഐ മുഖ്യകാർമികത്വം വഹിച്ചു. തുടർന്ന് ലദിഞ്ഞും നൊവേനയും അർപ്പിച്ചു.​അതിനുശേഷം വിശുദ്ധന്റെ തിരുസ്വരൂപവും വഹിച്ചുകൊണ്ട് പള്ളിയിൽ നിന്നും പുറത്തേക്ക് എഴുന്നള്ളിയ ഭക്തിനിർഭരമായ പ്രദിക്ഷണം കൊടിമരം ചുറ്റി തിരികെ പള്ളിയിൽ പ്രവേശിച്ചു. തുടർന്ന് നേർച്ച വിതരണവും നടന്നു. നൂറുകണക്കിന് വിശ്വാസികളാണ് ഭക്തിപൂർവ്വം വിശുദ്ധന്റെ തിരുസ്വരൂപം തൊട്ടുവണങ്ങി പ്രാർത്ഥനകളിൽ പങ്കാളികളായത്.​തിരുനാൾ ആഘോഷങ്ങൾക്ക് ഇടവക വികാരി റവ. ഫാ. ഷാജി കൊച്ചുപുരയ്ക്കൽ, അസിസ്റ്റൻറ് വികാരി റവ. ഫാ. വിബി പുറത്തുകാരൻ, കൈക്കാരന്മാരായ ജോസി ചുങ്കത്ത്, സോണി തോമസ്, അലക്സ് ചീരൻ, മനീഷ് സുരേഷ് എന്നിവർ നേതൃത്വം നൽകി.