ആലുവ: സിനിമാ ഷൂട്ടിംഗ് ലൊക്കേഷനിലുണ്ടായ ദാരുണമായ അപകടത്തിൽ ലൈറ്റിങ് ടെക്നീഷ്യൻ ഷോക്കേറ്റ് മരിച്ചു. തൃശ്ശൂർ സ്വദേശി വിഷ്ണുവാണ് മരണപ്പെട്ടത്. എടയാറിലെ വ്യവസായ മേഖലയിൽ സജ്ജീകരിച്ചിരുന്ന സിനിമാ സെറ്റിലാണ് അപകടം നടന്നത്.
പ്രമുഖ താരം നിവിൻ പോളി നായകനാകുന്ന പുതിയ ചിത്രത്തിന്റെ ചിത്രീകരണത്തിനിടെയാണ് സംഭവം. എടയാറിലെ ലൊക്കേഷനിൽ സിനിമയുടെ ആദ്യ ദിന ഷൂട്ടിംഗ് പുരോഗമിക്കുകയായിരുന്നു. ലൈറ്റിങ് വിഭാഗവുമായി ബന്ധപ്പെട്ട ജോലികൾ ചെയ്യുന്നതിനിടെ അപ്രതീക്ഷിതമായി വിഷ്ണുവിന് ശക്തമായി വൈദ്യുതാഘാതമേൽക്കുകയായിരുന്നു.
ഗുരുതരമായി പരിക്കേറ്റ വിഷ്ണുവിനെ ഒപ്പമുണ്ടായിരുന്ന സഹപ്രവർത്തകർ ഉടൻ തന്നെ സമീപത്തെ സ്വകാര്യ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. അപകടത്തെ തുടർന്ന് ചിത്രീകരണ ജോലികൾ താൽക്കാലികമായി നിർത്തിവെച്ചു. സംഭവത്തിൽ പോലീസ് സ്ഥലത്തെത്തി തുടർനടപടികൾ സ്വീകരിച്ചു വരുന്നു.
Comments are closed.