സുരക്ഷിതമായി റോഡ് മുറിച്ചുകടക്കാം; വരുന്നു ദേശീയപാത 66 കാപ്പിരിക്കാട് – കൊടുങ്ങല്ലൂർ റൂട്ടിൽ 8 പുതിയ നടപ്പാലങ്ങൾ, 12.99 കോടിക്ക് അനുമതി

ചാവക്കാട്: തൃശ്ശൂർ ജില്ലയിലെ കാൽനടയാത്രക്കാരുടെ ദീർഘനാളത്തെ കാത്തിരിപ്പിന് ഒടുവിൽ പരിഹാരമാകുന്നു. ദേശീയപാത 66-ന്റെ ആറുവരി വികസന പദ്ധതിയുടെ ഭാഗമായി കാപ്പിരിക്കാട് മുതൽ കൊടുങ്ങല്ലൂർ വരെയുള്ള മേഖലയിൽ 8 പുതിയ നടപ്പാലങ്ങൾ (Foot Over Bridges) നിർമിക്കാൻ ദേശീയപാത അതോറിറ്റി (NHAI) തത്വത്തിൽ അംഗീകാരം നൽകി. 12.99 കോടി രൂപ ചെലവഴിച്ചാണ് അത്യാധുനിക സൗകര്യങ്ങളോടെയുള്ള ഈ നടപ്പാലങ്ങൾ യാഥാർഥ്യമാക്കുന്നത്.ദേശീയപാത ആറുവരിയാകുന്നതോടെ റോഡ് മുറിച്ചുകടക്കാൻ പൊതുജനങ്ങളും സ്കൂൾ കുട്ടികളും നേരിടാൻ പോകുന്ന വലിയ സുരക്ഷാ ഭീഷണികൾ മുൻകൂട്ടി കണ്ടാണ് ഈ അടിയന്തര നടപടി.മന്ദലാംകുന്ന്, എടക്കഴിയൂർ, മണത്തല, പൊകുളങ്ങര, നാട്ടിക സെന്റർ, വലപ്പാട് ഹൈസ്കൂൾ പരിസരം, കൊപ്രക്കളം, പള്ളിനട എന്നീ യാത്രാക്ലേശവും അപകടസാധ്യതയും കൂടുതലുള്ള എട്ട് കേന്ദ്രങ്ങളിലാണ് പുതിയ ഫുട് ഓവർ ബ്രിഡ്ജുകൾ അനുവദിച്ചിരിക്കുന്നത്. പദ്ധതിക്കായി ആവശ്യമുള്ള അധിക ഭൂമി ഏറ്റെടുക്കുന്നതിനുള്ള നടപടികൾ ഒരു മാസത്തിനകം പൂർത്തിയാക്കാനാണ് അധികൃതരുടെ തീരുമാനം. ഇതിനുപിന്നാലെ പാലങ്ങളുടെ വിശദമായ എസ്റ്റിമേറ്റിനും രൂപരേഖകൾക്കും (Detailed Design & Estimate) അന്തിമ അനുമതി ലഭിക്കുന്നതോടെ നിർമാണപ്രവർത്തനങ്ങൾക്ക് വേഗത്തിൽ തുടക്കമാകും.ദേശീയപാത വികസനം അതിവേഗം പുരോഗമിക്കുമ്പോഴും കാൽനടയാത്രക്കാർക്ക് പാത മുറിച്ചുകടക്കാനുള്ള ബുദ്ധിമുട്ട് വലിയ പ്രതിഷേധങ്ങൾക്ക് കാരണമായിരുന്നു. തദ്ദേശവാസികൾ നിരന്തരമായി ഉന്നയിച്ചിരുന്ന ഈ ആവശ്യത്തിന് ഒടുവിൽ ഗ്രീൻ സിഗ്നൽ ലഭിച്ചതോടെ വലിയൊരു യാത്രാദുരിതത്തിനാണ് ശാശ്വത പരിഹാരമാകുന്നത്. വരും ദിവസങ്ങളിൽ തന്നെ ഇതിനായുള്ള പ്രാരംഭ നടപടികൾ ചാവക്കാട്, തളിക്കുളം, കൊടുങ്ങല്ലൂർ മേഖലകളിൽ സജീവമാകും.